«Qazaqmys» qyzmetkerleri qymbat metaldardy urlaǵan

JEZQAZǴAN. KAZINFORM  — Іshki ister mınıstrligi qala quraýshy kásiporyndardaǵy jedel jaǵdaıdy turaqty túrde baqylaýda ustaıdy jáne olardyń qyzmetine kedergi keltiretin adamdardyń zańsyz áreketiniń jolyn kesý boıynsha sharalar qabyldaıdy.

Sońǵy aıda Ulytaý oblysynda osyndaı birneshe toptardy ustaý júzege asyryldy.

 

«Uıymdasqan qylmysqa qarsy kúres bólinisiniń qyzmetkerleri «Qazaqmys korporatsııasy» JShS qaýipsizdik qyzmetimen birlesip, qymbat metall qorytpalaryn urlaýdy jolǵa qoıǵan qylmystyq top áreketiniń jolyn kesti. Topqa atalǵan kásiporynnyń qyzmetkerleri de kirgen. Kúdiktiler kásiporynnan 6,5 mln teńge ónimin urlaý kezinde ustaldy. Qazirgi ýaqytta olardyń basqa qylmystarǵa qatysy bar-joǵy tekserilip jatyr. Sondaı-aq polıtsııa 2022 jyldyń naýryz aıynda jergilikti kásipkerden 20 mln teńge bopsalaǵan taǵy bir top múshelerin quyrqtady. Jábirlenýshini jaldamaly páterge aldap alyp kelip, fızıkalyq kúsh qoldanyp, qarý-jaraqpen qorqytý arqyly aqsha talap etken. Sonymen qatar 2018 jyly oryn alǵan jergilikti turǵyndy óltirýge oqtalý áreketi áshkerelendi. Jergilikti krımınalıtetten quralǵan qylmystyq top anyqtaldy. Oǵan qatysýshylar qazirgi ýaqytta basqa qylmystar jasaǵany úshin jazasyn ótep jatyr. Kisi óltirýge oqtalý áreketi jasalǵan tapansha tárkilendi. Kórsetilgen faktiler boıynsha barlyǵy 17 adam ustalyp, ishki ister organdaryna jetkizildi. 20-dan astam tintý sharalary ótkizildi, nátıjesinde 5 atys qarýy, oq-dáriler, pyshaqtar jáne ekstremıstik sıpattaǵy dinı ádebıetter tárkilendi. Barlyq fakti boıynsha sotqa deıingi tergeý júrgizilip jatyr. Óńirlerde qylmystyq toptardyń qyzmetine jol bermeý jumystary jalǵasyp jatyr», – dedi ІІM Uıymdasqan qylmysqa qarsy kúres departamentiniń basqarma bastyǵy Qýandyq Alpys.

Ulytaý oblysynda áleýmettik mańyzy bar azyq-túlik taýaryna saýda ústemesiniń mólsherin negizsiz arttyrǵan 205 kásipker jazalanǵanyn jazǵan bolatynbyz.