«Qazaqmys» kenishinde taǵy eki adam qaza boldy

«Qazaqmys» kompanııasynyń Jambyl oblysyndaǵy «Jaısan» kenishinde eki jumysshy qaza boldy. Kazinform bul týraly kompanııanyń resmı saıtyna silteme jasap habarlaıdy.

«Qazaqmys» kompanııasy 27 qarashada Jambyl oblysyndaǵy «Jaısan» kenishinde bolǵan jazataıym oqıǵa týraly ókinishpen habarlaıdy.

Taý-ken jumystaryn júrgizý kezinde Ǵ. Omarov atyndaǵy shahta prohodkalaý trestiniń 1981 jáne 2002 jyly týǵan qyzmetkerleri (úńgýshiler) aýyr jaraqat saldarynan qaza boldy.

Arnaıy komıssııa jazataıym oqıǵanyń mán-jaıy men sebepterin anyqtap jatyr.

«Qazaqmys» kompanııasynyń basshylyǵy men eńbek ujymy qaza tapqandardyń týystary men jaqyndaryna qaıǵyryp kóńil aıtady», - delingen habarlamada.

Kenishke Jambyl oblystyq Eńbek ınspektsııasynda qurylǵan arnaıy top baratyny belgili boldy.

«Búgin qaıǵyly oqıǵa oryn alǵan jerge Jambyl oblystyq Eńbek ınspektsııasynyń arnaıy qurylǵan komıssııa toby barady. Basqa aqparattar arnaıy komıssııanyń sheshiminen soń belgili bolady. Ázirge tergep-tekserý júrgizilip, oqıǵanyń mán-jaıy anyqtalýda», - deıdi Jambyl oblystyq Tótenshe jaǵdaılar qyzmeti baspasóz hatshysy Sáýle Munataeva.

Aıta keteıik, «Qazaqmysqa» tıesili kenishterde sońǵy ýaqytta jazataıym oqıǵalar kóbeıdi. Málesen, osydan bir apta buryn «Qazaqmys» kompanııasynyń Jezqazǵan baıytý fabrıkasynda mashınıst mert boldy.

Al 6 qarashada Shyǵys Jezqazǵan kenishiniń №57 shahtasynda jumysshy qaza taýyp, «Jylandy» kenishinde 6 qyzmetker jaraqat alǵany habarlanǵan edi.

«Qazaqmys» – Qazaqstandaǵy eń iri mys óndirýshi. Kompanııanyń quramynda 10 kenish, bes taý-ken baıytý fabrıkasy, eki mys balqytý zaýyty, eki kómir razrezi bar. «Qazaqmys» kendi óndirýdi jáne ony taýarlyq metalǵa óńdeýdi júrgizetin óndiristik obektilerdi basqarady.

Al «Jaısań» kenishindegi jumys 2020 jyly bastalǵan.