«Qazaqmys» kenishinde taǵy da jumysshy qaza boldy
Ulytaý oblysyndaǵy «Jylandy» kenishinde 31 jastaǵy jumysshy mert boldy, dep habarlaıdy Kazinform.
««Qazaqmys» kompanııalar toby Ulytaý oblysynda ornalasqan «Jylandy» kenishinde 26 jeltoqsan kúni qaıǵyly oqıǵa bolǵanyn qaıǵyra habarlaıdy.
Saǵat 18.30-da shahta ýchaskeleriniń biri – «Shyǵys Sary-Obada» ózdigimen júretin jerasty mashınasynyń óndiris ornyna qozǵalysy barysynda júrgizýshi 1992 jyly týǵan mashınıstti abaısyzda basyp ketti. Saldarynan jumysshy ólimge alyp kelgen aýyr jaraqattar aldy.
Arnaıy komıssııa jazataıym oqıǵanyń mán-jaıy men sebebin anyqtap jatyr.
«Qazaqmys» kompanııasynyń basshylyǵy men eńbek ujymy qaza bolǵan jumysshynyń týystary men jaqyndaryna kóńil aıtady», - delingen kompanııa málimetinde.
Eske salaıyq, 26 jeltoqsan kúni ótken Úkimet otyrysynda Premer-Mınıstr Álıhan Smaıylov bıyl «Qazaqmys» kompanııasynda óndiristik jaraqat alý kórsetkishi ótken jylmen salystyrǵanda 3 eseden astamqa artqanyn atap ótken bolatyn.
Aıta keteıik, «Qazaqmysqa» tıesili kenishterde sońǵy ýaqytta jazataıym oqıǵalar kóbeıdi. Málesen, 27 qarashada kompanııanyń Jambyl oblysyndaǵy «Jaısan» kenishinde Taý-ken jumystaryn júrgizý kezinde Ǵ.Omarov atyndaǵy shahta prohodkalaý trestiniń 1981 jáne 2002 jyly týǵan jumysshylary aýyr jaraqat alyp, kóz jumdy.
22 qarashada «Qazaqmys» kompanııasynyń Jezqazǵan baıytý fabrıkasynda mashınıst mert boldy.
Al 6 qarashada Shyǵys Jezqazǵan kenishiniń №57 shahtasynda jumysshy qaza taýyp, «Jylandy» kenishinde 6 qyzmetker jaraqat alǵany habarlandy.
«Qazaqmys» – Qazaqstandaǵy eń iri mys óndirýshi. Kompanııanyń quramynda 10 kenish, bes taý-ken baıytý fabrıkasy, eki mys balqytý zaýyty, eki kómir razrezi bar. «Qazaqmys» kendi óndirýdi jáne ony taýarlyq metalǵa óńdeýdi júrgizetin óndiristik obektilerdi basqarady.
