«Qazaqmys» qaza tapqan kenshilerdiń otbasyna barlyq nesıesin ótep berýge 90 mln teńge bóldi

ASTANA. KAZINFORM -  «Qazaqmys» korporatsııasy Ujymdyq shart pen ómirdi saqtandyrý baǵdarlamasynyń mindettemelerin oryndaý aıasynda kenshilerdiń otbasyna jan-jaqty kómek kórsetýdi jalǵastyrýda. Kompanııa qaza bolǵan kenshilerdiń otbasylaryna tolyqtaı nesıelerin ótep berýge kómektesti, dep habarlaıdy Kazinform tilshisi.

«Jomart» kenishinde qaza bolǵan jumyskerlerdiń otbasylarynyń ekinshi deńgeıli bankter men mıkroqarjy uıymdary aldyndaǵy negizgi boryshtarynyń qaryzy tolyǵymen tólendi.

«Tólemderdiń jalpy somasy shamamen 90 mln teńgeni qurady. Ári qaraı otbasylar qarjy uıymdary aldyndaǵy qaryzdy óz betinshe óteýi tıis. Buǵan deıin «Qazaqmys» barlyq otbasyǵa 10 jyldyq jalaqy mólsherinde (84 mln teńgeden 142 mln teńgege deıin) ótemaqy jáne jerleý rásimine 550 AEK (2,2 mln teńge) kóleminde járdemaqy tóledi. Sonymen qatar «KM Life» AQ saqtandyrý kompanııasy jerleý rásimin atqarý úshin ár otbasyna 100 AEK tóledi», - dep málimdelgen «Qazaqmys» Korporatsııasynyń habarlamasynda.

Sondaı-aq balalary 23 jasqa tolǵanǵa deıin aı saıyn 524 myńnan 921 myń teńgege deıin asyraýshysynan aıyrylýyna baılanysty saqtandyrý tólemi taǵaıyndalady. Kórsetilgen somalar jyl saıyn ınflıatsııa deńgeıine sáıkes ındeksteledi.

Buǵan qosa qazir týystaryn jumysqa ornalastyrý jáne qazaqstandyq joǵary oqý oryndarynda oqıtyn stýdent balalarynyń oqý aqysyn tóleý máselesi qarastyrylýda.

Búgin «Jomart» kenishindegi apatty tergeýdiń aldyn ala qorytyndylary qaraldy.

Sonymen qatar Ulytaý oblysynyń ákimi Dastan Ryspekov Prezıdent Qasym-Jomart Toqaevqa «Qazaqmys» korporatsııasynyń kenishinde taıaýda bolǵan apat saldarynan qaza tapqan shahterlerdiń otbasylaryna qandaı kómek kórsetilip jatqanyn aıtty.