Qazaqmys ESG-transformatsııa salasyndaǵy jetistikterin tanystyrdy
ASTANA. KAZINFORM — Senat spıkeri Máýlen Áshimbaevtyń tóraǵalyǵymen QR turaqty damý salasyndaǵy ulttyq maqsattar men mindetterdi iske asyrý monıtorıngi jónindegi parlamenttik komıssııanyń «ESG-transformatsııa: turaqty damý maqsattaryn iske asyrýdaǵy bıznestiń róli» otyrysynda «Qazaqmys korporatsııasy» JShS ókilderi kompanııanyń osy saladaǵy jetistikterin tanystyrdy.
Turaqty damý jónindegi dırektor Sáken Shaıahmetov óz sózinde Qazaqstan Parıj kelisimin ratıfıkatsııalaǵan el retinde parnıktik gazdar shyǵaryndylaryn azaıtýda belsendi ról atqarýy tıis ekenin atap ótti.
Búgingi jaǵdaı sońǵy 10 jylda órtten bolǵan zalal ondaǵan mıllıard teńgege baǵalanyp otyrǵanyn, 2024 jylǵy sý tasqyny el men halyq úshin orasan zor zalal keltirgenin kórsetedi.
Qazaqmys, KAZ Minerals, Altyn Almas, Qarajyra jáne RBK Bank kompanııalarynyń toptary turǵyn úıler men ınfraqurylymdy qalpyna keltirýge 40 mlrd teńge bóldi.
Sonymen qatar, osy bastamany qoldaý maqsatynda kenshiler men metallýrgter atynan eńbek ujymdary óz kúshterimen 50 tonnadan astam gýmanıtarlyq kómek jınap, Qostanaı oblysy Torǵaı aýdanynyń turǵyndaryna jetkizildi.
Bul derekter únemdi óndiris pen ESG prıntsıpterin ilgeriletý qajettiligin kórsetedi, óıtkeni jahandyq jylynýdyń áseri bizdiń elde baıqalady.
«Qazaqmys áleýmettik baǵdarlanǵan kompanııa retinde jáne bolashaq urpaq aldyndaǵy jaýapkershiligin sezine otyryp, búgingi kúni óziniń damý strategııasyna ESG qaǵıdattaryn engizýde», — dep atap ótti Sáken Shaıahmetov.
Qazaqmys kompanııalar toby áleýmettik baǵdarlamalar men qaıyrymdylyqqa 2007 jyldan beri 296 mlrd teńgeden astam qarjy bóldi.
Onyń ishinde shamamen 115 mlrd teńge sońǵy 3 jylda ǵana bólingen.
Sondaı-aq, Qazaqmys kompanııalar tobynyń merdigerlik uıymdaryn qosa alǵanda, 120 myńnan astam jumys orny quryldy.
2023 jyly el bıýdjetine 298 mlrd teńge salyq tólendi.
Sóz sońynda Shaıahmetov senatorlarǵa bıznestiń áleýmettik jaýapkershiligin eskere otyryp, QR Ekologııalyq kodeksin teńgerimdeý, memlekettik qoldaýdyń jańa qarjylyq jáne qarjylyq emes negizderin engizý jáne iri kompanııalar, ÚEU men halyqaralyq ınstıtýttar arasynda kooperatsııa úshin jaǵdaılar jasaý máselelerin qaraýdy usyndy.
