Qazaqmys basqarý qurylymyn túrlendirip, basshylyq quramy sanyn qysqartady
ASTANA. KAZINFORM — «Qazaqmys» korporatsııasy» JShS-nyń basqarma tóraǵasy Nurahmet Nýrıev Jezqazǵanda eńbek ujymdarymen kezdesý barysynda korporatsııanyń basqarmasy men kadrlyq saıasatynda aýqymdy reformanyń bastalǵanyn málim etti.
Ózgeristerdiń maqsaty – basqarý tıimdiligin arttyrý, jumysshylardyń máselelerin jedel sheshý, ónerkásiptik qaýipsizdikti, eńbekti qorǵaýdy jáne áleýmettik qoldaýdy jaqsartý. Sonymen qatar reforma barlyq deńgeıdegi ashyqtyq pen jaýapkershilikti arttyrýǵa baǵyttalǵan.
Qaıta qurý aıasynda eki basqarýshylyq deńgeı joıylady: korporatsııanyń bas dırektory jáne taý-ken baıytý kesheniniń bas dırektory. Fılıal júıesi de qaıta qarastyrylady. Bul sheshim qabyldaýdy jedeldetýi jáne kompanııa ishindegi baılanysty jaqsartýy tıis.
Kezdesý barysynda Nurahmet Nýrıev Oleg Kopytovqa kompanııanyń bas dırektory laýazymynda atqarǵan jumysy úshin alǵysyn bildirip, aldaǵy ýaqytta sáttilik tiledi. Sondaı-aq ol jańa orynbasarlaryn tanystyrdy: Saıat Bákirov (óndiris jónindegi) jáne Ǵalym Nurjanov (geologııa jáne damý jónindegi).
Qurylymdardyń túrlenýine qatysty aıtar bolsaq, endigi ýaqytta óndiristik barlyq kásiporyn tehnologııalyq jáne geografııalyq qaǵıdat boıynsha qaıtadan qurylady. Maýsymǵa deıin kompanııanyń qurylymynda bes derbes bólimshe jasaqtalady:
• Nurqazǵan taý-ken óndirisi
• Jezqazǵan taý-ken óndirisi
• Qaraǵaıly taý-ken óndirisi
• Balqash taý-ken óndirisi
• Shatyrkól-Jaısan taý-ken óndirisi
Árbir bólimsheni máselelerdi jedel sheshý úshin qajetti ókilettikter berilgen tájirıbeli basshy basqarady. Basqarýdyń jańa júıesi árbir bólimsheniń óndiristik, áleýmettik jáne eńbek máselelerin sheshýdegi derbestigin qamtamasyz ete otyryp, sheshim qabyldaý úderisin berýge jol ashady.
Jańa qurylymdardyń basshylary kóshpeli kezeńde barlyq úderisti qaıta qurýmen, tıimdi ózara is-qımyldy qalyptastyrýmen jáne óndiristiń úzdiksiz jumysyn qamtamasyz etýmen aınalysady. 1 maýsymǵa deıin beıimdeý kezeńin aıaqtap, jańartylǵan pishimde jumysty jolǵa qoıý josparlanǵan.
Osyǵan deıin Qazaqmys stýdentteri zamandastaryn metallýrg bolýǵa shaqyratyny habarlandy.