Qazaqmys Balqash kólin saqtaýǵa 5 mln dollar bólmekshi
ASTANA. KAZINFORM – «Qazaqmys» korporatsııasy Balqash kólin saqtaýdyń jol kartasyna 5 mln dollar (shamamen 2,6 mlrd teńge – red.) bólmekshi.
Al Frantsııa damý agenttigi (AFD) osy jol kartasynyń sheberlik josparyn ázirleýge 1,35 mln eýro (shamamen 765,6 mln teńge – red.) baǵyttap otyr.
Bul týraly Sý resýrstary jáne ırrıgatsııa mınıstri Nurjan Nurjigitov Májiliste ótken Úkimet saǵatynda aıtty.
- Frantsııa agenttigi bizdiń ǵylymı-tehnıkalyq ýnıversıtettermen birge Balqash kólin saqtaý jónindegi sheberlik josparyn ázirlep jatyr. Onyń syrtynda «Qazaqmys» korporatsııasy osy jospardy iske asyrýǵa 5 mln dollar bóldi, - dedi vedomstvo basshysy.
Onyń sózinshe, sheberlik jospary Balqashty saqtap qalý úshin qandaı naqty jobalardy iske asyryp, qandaı sheshimder qabyldaý kerektigin aıqyndap beretin qujat bolmaq. Al mınıstrlik ony 2040 jylǵa deıin iske asyrýǵa tıis.
Sheberlik josparyn ázirleý jumystary ǵylymı zertteýlerden bastalmaq. Onyń ishinde Balqashqa keletin transshekaralyq ózender men el ishindegi salalarynan quıatyn sýdyń kólemi qalaı ózgerip jatqany, kól basseınindegi ekologııalyq ahýal, oǵan jerdiń astynan qosylatyn sýdyń dınamıkasy, aıdyn aýmaǵyndaǵy energetıkalyq jobalardyń tabıǵatqa tıgizer áseri túgel zerdelenýi kerek.
Mınıstrlik osy sheberlik jospardy iske asyrýdyń jol kartasyn ázirlepti. Ol qujatta Іle- Balqash kóliniń deńgeıin baqylaýǵa arnalǵan tsıfrlyq platforma qurý, sý nysandaryn avtomattandyrý jáne tsıfrlandyrý, basym gıdrotehnıkalyq qurylystardy damytý sharalary qarastyrylǵan.
Balqashtyń taǵdyry Іle transshekaralyq ózeni arqyly Qazaqstan aýmaǵyna kiretin sýdyń kólemine tikeleı baılanysty. Sondyqtan Іle-Balqash basseınin Qytaı Halyq Respýblıkasymen birlesip sý qorǵaý jáne ózendi ornyqty paıdalaný máselelerin qamtıtyn is-sharalardy iske asyrý kózdelip otyr.
Qazir Frantsııanyń Geologııalyq jáne taý-ken zertteýler bıýrosy (BRGM) sheberlik jospardy ázirleý aıasynda qazaqstandyq mamandarmen birge qajetti málimetterdi jınastyryp jatyr. BRGM sarapshylary Balqash basseınindegi uńǵymalar men gıdrobeketterdi, sýarmaly alqaptardy aralamaqshy.