«Qazaqkontserttiń» 60-shy mereıtoılyq maýsymy ashyldy
Ónerdiń kıeli ordasyn 60 jyldyq mereıtoıymen alǵashqylardyń biri bolyp QR Mádenıet jáne sport mınıstri Aqtoty Raıymqulova quttyqtady.
«Esimderi qazaq mádenıetiniń tarıhyna altyn árippen jazylǵan sahna abyzdarynyń izin jalǵap, talaı talanttyń ónerin shyńdaǵan irgeli mekeme búginde el mádenıetiniń qara shańyraǵyna aınalyp otyr. Tarıhy baı, tamyry tereń ujym ulttyń rýhanı múddesin ulyqtap, otandyq ónerdiń damýyna zor úles qosyp kele jatyr. Alpystyń asýyn baǵyndyryp, ıgi dástúr men jańashyldyqty ushtastyra bilgen «Qazaqkontsert» árdaıym óner súıer qaýymnyń ystyq yqylasyna bólene berýine tilektespin. Osynaý taǵylymy tereń óner ordasynda eńbek etip júrgen ártister men barlyq óner ujymyn 60 jyldyq mereıtoımen shyn júrekten quttyqtaımyn!»,- delingen mınıstrdiń quttyqtaý hatynda.
Quttyqtaýlar legin qazaqtyń bulbul ánshisi, halyq ártisi Bıbigúl Tólegenova jalǵastyrdy.
«Qazaqkontserttiń torqaly toıy qutty bolsyn! Jamal Omarova, Roza Baǵlanova, Shara Jıenqulova, Rabıǵa Esimjanova, Júsipbek Elebekov syndy ańyz tulǵalardyń esimimen baılanysty Qazaqkontserttiń mádenıet salasynda alar orny erekshe. Qazirgi ýaqytta bul mekeme qanatyn keńge jaıǵan iri mádenıet ordasyna aınaldy. «Qazaqkontsert» uıymy órkendeı bersin, qazaq óneri asqaqtasyn!», – dedi Bıbigúl Ahmetqyzy.
Eskendir Hasanǵalıev, Baıǵalı Serkebaev, Bekbolat Tileýhan, Arman Júdebaev, Aıqyn Tólepbergen syndy elimizdiń belgili óner tulǵalary, sondaı-aq Ózbekstan memlekettik fılarmonııasynyń ujymy, Ózbekstan Ulttyq sımfonııalyq orkestriniń bas dırıjeri Alıbek Kabdýrahmanov syndy sheteldik áriptester de óz quttyqtaýlaryn joldady.
Kontserttik uıym óziniń 60-shy kontserttik maýsymyn «Qazaqkontsert álemi: bizge 60 jyl!» úlken mereıtoılyq jobamen ashty. Kórermendersiz ótetin kontsert pen benefıs-shoýdyń televızııalyq nusqasy «Habar» telearnasynan jaqyn ýaqytta kórsetiledi. Joba barysynda óner súıer qaýym 1960 jyldan bastap qazirgi ýaqytqa deıingi qazaq mýzyka óneriniń tarıhyna mýzykalyq saıahat jasap, barshaǵa tanylǵan hıt ánder men jańa týyndylardy tyńdaı alady. Mereıtoılyq jobada Roza Rymbaeva, Maqpal Júnisova, Jeńis Ysqaqova, Dımash Qudaıbergen, Móldir Áýelbekova, Qurmash Mahan, Alısher Karımov, Ámire, «Dos-Muqasan» ansambli, «Mýzart» toby, t.b. «Qazaqkontsert» uıymynyń óner ujymdary men belgili solısteri óner kórsetedi.
«Qazaqkontsert» uıymynyń dırektory Jeńis Seıdýllaulynyń aıtýynsha, bul 60 jyldan beri óner súıer qaýymnyń jansaraıyn ásem áýenmen jadyratyp júrgen kıeli qarashańyraq tartý etetin jańa jobalardyń bastamasy ǵana.
«Bul kontserttik maýsym – biz úshin aıryqsha beles. Kórermendermen qaýyshýǵa asyqqan «Qazaqkontsert» ujymynyń jańa maýsymda jurtshylyqqa usynar jańalyǵy az emes. Mereıtoılyq jyldyń aıasynda ártisterimiz kórermenderdi onlaın jáne dástúrli formattaǵy jańa kontserttik baǵdarlamalarmen, keremet premeralar jáne tyń jobalarmen qýantady. Alpystyń asýyn baǵyndyryp, ıgi dástúr men jańashyldyqty qatar ushtastyra bilgen Qazaqkontserttiń barlyq jobalary bıylǵy kontserttik maýsymda da halyqty rýhanı sýsyndatyp, barshaǵa qoljetimdi bolmaq»,- dedi uıymnyń basshysy.
