«Qazaqkontsert» jańa kontserttik maýsymnyń shymyldyǵyn ashty
NUR-SULTAN. QazAqparat – «Qazaqkontsert» memlekettik kontserttik uıymynyń jańa 59-kontserttik maýsymy ashyldy, dep habarlaıdy QazAqparat tilshisi.
Alǵashqy maýsymashar kontsertinde kórermen qaýymǵa jańa kontserttik baǵdarlama usynyldy. Súıikti tanymal ánder men jańa týyndylar jandy daýysta oryndalǵan keremet kesh talǵampaz tyńdarmanǵa erekshe qýanysh syılady. Bul keshte qazaq mýzyka óneriniń barlyq janrlary men baǵyttary qamtylǵan jańa kontserttik baǵdarlama usynyldy. Ónersúıer qaýymmen jańa maýsymda qaıta qaýyshqan «Qazaqkontsert» artısteriniń óneri joǵary baǵalandy.
Sahnada Roza Rymbaeva, Erlan Rysqalı, Azamat Jyltyrkózov, Móldir Áýelbekova, Dinıslambek Jaılaýbaı, Erbolat Shaldybekov, Ardaq Eleýsiz, Bıbigúl Januzaq, Nurlytań Ermek, Kúnsulý Túrikpen, Gúlnar Kóshenova syndy belgili óner juldyzdarymen qatar, kórermenniń yqylasyna bólengen «Forte trıo», «Solıster akademııasy», «Astana sazy» óner ujymdary, «Astana mıýzıkl» memlekettik teatry, «Nazar», «Saz&soul», «Voice KZ», «Dara» sııaqty estradalyq toptar óner kórsetti.
«Jańa maýsymda 100-den astam mádenı is-shara ótedi. 2020 jyly 60 jyldyǵyn atap ótetin qazaq mýzyka óneriniń qarashańyraǵy úshin bul kontserttik maýsym aıryqsha beles bolmaq. Mereıtoılyq jyldyń aıasynda Qazaqkontsert artısteri kórermenderdi jańa kontserttik baǵdarlamalarmen, keremet premeralar jáne tyń qoıylymdarmen qýantady. Ádettegideı, Qazaqkontsert usynatyn is-sharalar barsha halyq úshin qoljetimdi bolady. Sondaı-aq jańa kontsertter men qoıylymdardy tek elordalyq kórermen ǵana emes, elimizdiń barlyq óńirleri de tamashalaı alady, - dep atap kórsetti «Qazaqkontsert» MKU dırektory Jeńis Seıdýllauly.
Buǵan qosa, Jeńis Seıdýllauly bıyl «Qazaqkontsert» uıymynyń ártisteri ári elimizge belgili ánshiler – Roza Rymbaeva jáne Maqpal Júnisovanyń Tashkent qalasynda kontsertteri ótetinin aıtty. Atalmysh is-sharalar Ózbekstandaǵy Qazaqstan jyly aıasynda uıymdastyrylmaq.
