«Qazaqkontsert» uıymyna jańa basshysy taǵaıyndaldy

ASTANA. QazAqparat - Qazaqstan Respýblıkasy Mádenıet jáne sport mınıstriniń buıryǵymen tanymal qazaqstandyq rejısser Ashat Maemırov «Qazaqkontsert» Memlekettik kontsert uıymy dırektorynyń mindetin atqarýshy bolyp taǵaıyndaldy, dep habarlaıdy mks.gov.kz .

Aıtyp ketý kerek, «Qazaqkontsert» Memlekettik kontsert uıymy - Almaty qalasynda 1960 jyldary qurylǵan Qazaqstandaǵy eń iri mýzykalyq uıymdardyń biri. Óziniń baı tarıhynyń alǵashqy kúnderinen-aq «Qazaqkontsert» qazaqstandyq mádenıettiń kósh basynda boldy. Bul jerde elimizdiń úzdik ártisteri men shyǵarmashylyq ujymdary bas qosqan. «Qazaqkontserttiń» keshteri aýqymdy kórermen aýdıtorııasyn jınaıdy, al baǵdarlamalary janrlyq san-alýandylyq pen oryndaýshylardyń joǵary kásibıligimen erekshelendi.

«Qazaqkontsertte» barlyq janrlar usynylǵan: halyq óneri, klassıka, estrada. Shyǵarmashylyq quramǵa folklorlyq-etnografııalyq ansambl, «Akademııa solıstov» memlekettik kameralyq orkestri, «Astana Musical» teatry, estradalyq jáne operalyq ánshiler kiredi.

Búgingi tańda «Qazaqkontsert» kórekti Astanamen óziniń jańa belesterin baılanystyra otyryp, aty ańyzǵa aınalǵan uıymnyń dańqty tarıhyn jalǵastyryp keledi.

Ashat Maksımuly Maemırov - teatr óneriniń magıstri, dotsent, fılosofııa ǵylymdarynyń doktory (PhD) - T. Júrgenov atyndaǵy Qazaq ulttyq óner akademııasyn drama teatr rejısseri mamandyǵy boıynsha aıaqtaǵan. «Bolashaq» Prezıdent stıpendııasynyń ıegeri. 2008 jyly Frantsııanyń tanymal Université Sorbonne Nouvelle Paris 3 ýnıversıtetinde bilim alyp, Drama óneriniń Parıj ulttyq konservatorııasynda taǵylymdamadan ótken. 2010 jyly Reseı teatr óneri akademııasynda (GITIS) teatr óneri magıstri dárejesin aıaqtap shyqty.

Túrli jyldary Ashat Maksımuly Batys Qazaqstan oblystyq halyq shyǵarmashylyǵy ortalyǵynyń bas rejıssery, M. Ótemisov atyndaǵy Batys Qazaqstan Memlekettik ýnıversıteti «Rejıssýra, horeografııa jáne KDR» kafedrasynyń oqytýshysy, Qurmanǵazy atyndaǵy Oral mýzykalyq kolledjiniń «Akterlyq óner» bóliminiń meńgerýshisi, Batys Qazaqstan oblystyq qazaq drama teatrynyń rejısseri, T. Júrgenov atyndaǵy QazUÓA «Teatrlyq óner» fakýltetiniń dekany, «Qazaqstannyń rýhanı damý qory» AQ-nyń vıtse-prezıdenti, sondaı-aq «Qazaq áýenderi» AQ-nyń  prezıdenti retinde qyzmet atqardy. 2014 jyldan bastap osy kúnge deıin T. Júrgenov atyndaǵy QazUÓA «Akterlik sheberlik jáne rejıssýra» kafedrasynyń dotsenti bolyp tabylady.