«Qazaqkontsert» astanalyqtarǵa umytylmas kesh syılady
Otan qorǵaýshylar kúni men Jeńis kúnine arnalǵan kontsert orkestrdiń súıemeldeýimen názik áýennen bastaldy. Beıbit te, mamyrajaı tirliktegi balalardyń oıynyn zeńbirekter men myltyq oǵynyń daýysy buzady. Osy kezde ortaǵa shyqqan sarbazdar balalarǵa pana bolyp, qan maıdanǵa bel sheshe enip, Otanyna qorǵan bola bildi. Osynaý tarıhtyń surapyl shaqtaryn sheber akterler kórermenniń kóńil tórine jetkize bildi. Qoıylymdardaǵy ár fragmentke zaldaǵy halyqtyń dý qol shapalaǵy osyǵan dálel. Urys sahnasy dombyra men qobyzdyń qońyr kúıimen súıemeldengenin aıta ketý kerek.
Akterlermen birge kontsertte estrada juldyzdary óner kórsetti. Maıdan shebindegi kórinisterdi ánmen árlegen Altynbek Qorazbaev, Jeńis Ysqaqova, Jeńis Seıdollauly, Medeý Arynbaev, Altynaı Jorabaeva, Móldir Áýelbekova, Tamara Asar jáne taǵy basqa ánshilerdiń óneri kópshiliktiń qurmet-qoshemetine ıe boldy. Akterlerdiń ár qoıylymy tanymal ánshilerdiń ánimen ulasyp, zalǵa lyq tolǵan halyqtyń kóńil pernesin dóp basa bildi.
Eske sala ketsek, buǵan deıin «Qazaqkontsert» memlekettik kontserttik uıymy elordada estrada juldyzdarynyń qatysýymen ótetin «Jeńis týy, jelbire» atty kontsertke keletin meımandarǵa 700 bıletti tegin taratqanyn habarlaǵan edik. Bıletter «Qazaqkontsert» MKU ujymynyń soǵys jáne tyl ardagerleri qaýymdastyǵy, Qazaqstannyń «Ardagerler uıymy», Astana qalalyq «Aýǵan soǵysy ardagerleri men múgedekteri», «Chernobyl ardagerleri», Qarttar úıi, «Sharapat» áleýmettik qyzmet ortalyǵy, Astanadaǵy «SOS balalar aýyly» jáne balalar úıiniń ókilderine berilgen. «Qazaqkontsert» birlestiginiń basshysy Jeńis Seıdollauly atalǵan uıymdarǵa «Jeńis týy, jelbire!» kontsertine tegin bılettermen qosa, materıaldyq kómek te kórsetiletinin aıtqan bolatyn.
