Qazaq–qyrǵyz shekarasyndaǵy ótkizý pýnkti táýlik boıy jumys isteýge kóshti
ASTANA.KAZINFORM — 25 tamyzdan bastap Qazaqstan men Qyrǵyzstan shekarasyndaǵy «Qarqara-avtomobıl» ótkizý pýnkti táýlik boıy jumys rejımine kóshti. Bul týraly Kazinform agenttiginiń menshikti tilshisi habarlaıdy.
Qyrǵyz Respýblıkasynyń UQK Shekara qyzmetiniń málimetinshe, bul sheshim Qazaqstan Respýblıkasynyń Prezıdenti Qasym-Jomart Toqaevtyń Qyrǵyzstanǵa resmı sapary aıasynda eki el basshylary arasynda qol jetkizilgen ekijaqty kelisimderdiń nátıjesinde qabyldanǵan.
Ystyqkól oblysynyń Túp aýdanynda ornalasqan «Qarqara-avtomobıl» baqylaý-ótkizý pýnkti kópjaqty pýnkt sanalady jáne adamdar men kólik quraldarynyń ótýine arnalǵan.
2026 jyly «Qarqara-avtomobıl» ótkizý pýnkti aýmaǵynda zamanaýı shekara ınfraqurylymyn salý josparlanǵan. Bul onyń ótkizý qabileti men shekaralyq baqylaýdyń jalpy tıimdiligin aıtarlyqtaı arttyrýǵa múmkindik beredi.
Aıta keteıik, buǵan deıin bul ótkizý pýnkti tek kúndizgi ýaqytta jumys istegen. 2024 jyldyń qazanynda Qyrǵyz Respýblıkasynyń Jogorký Keneshi shekaradaǵy ótkizý pýnktiniń táýlik boıy jumys isteý rejımin qoldaǵan bolatyn, keıinnen Qyrǵyzstan Prezıdenti Sadyr Japarov bul kelisimdi ratıfıkatsııalady.
Osydan buryn Qyrǵyzstanda Abaı Qunanbaıulynyń qurmetine kóshe ataýy berilip, eskertkish ornatylatyny anyqtaldy.