Qazaqqa kelin bolýdy jazǵan taǵdyryma rızamyn - Natalıa Nagochevskaıa
Natalıanyń aıtýynsha, onyń da ata-ájesi sonaý 1936 jyly deportatsııa kezinde Qazaqstanǵa jer aýdarylǵan eken. Eldi asharshylyq jaılaǵan zamanda qazaqtar olardy ózekten tepken joq. Kerisinshe, bir úzim nan berip, baýyryndaı ystyq qushaǵymen qarsy aldy. Búgingi kúni onyń ózi de ata-babalary baýyr basqan qazaq halqynyń kelini, qazaq jigitiniń súıikti jary atanyp otyr.
«Mańdaıyma qazaq jigitiniń jan jary bolý jazyldy. Óz basym taǵdyryma rızamyn. Qazaqtyń Belgibaı esimdi azamatymen otbasyn quryp, Arlan jáne Rýslan esimdi qos ulyn tárbıelep otyrmyn. Uldarymyz eki halyqtyń da eń jaqsy qasıetterin boılaryna sińirip ósip keledi. Eki jaqtyń týǵan-týysqandarymen de etene jaqyn aralasyp turamyz. Ultym polıak bolsa da, qazaqtyń kelini retinde barlyq jón-joralǵylardy oryndap, úı ishimizben salt-dástúrge qurmetpen qaraımyz», - deıdi Natalıa Nagochevskaıa.
Sonymen qatar keıipkerimiz, ult bolyp uıysýymyzdyń basty quraly - qazaq tili bolǵandyqtan, memlekettik tildi meńgerýdi kez kelgen qazaqstandyq óziniń mańyzdy mindeti dep bilýi kerektigin aıtýda.
«Osydan on shaqty jyl buryn qazaqsha sóılep júrgen ózge ult ókilderin sırek kezdestirýshi edim. Qazir qarap otyrsam olardyń qatary jyl sanap tolysyp keledi. Qazaq halqynda til de, tárbıe de balanyń boıyna ananyń aq sútimen darıdy degen túsinik bar. Ultyna qaramaı, ata-analary qaı tilde sóılese, balalary da sony sanasyna sińiredi. Sondyqtan, qazaq topyraǵynda dúnıege azamat retinde óz zamandastarymdy qazaq tilinde sóıleýge, urpaǵymyzdy otansúıgishtikke baýlýǵa shaqyramyn», - dep sózin túıindedi qazaqtyń kelini Natalıa Nagochevskaıa.
