Qazaqqa kelin bolǵan káris qyzy zeınet jasynda ulttyq mádenıetti dáriptep júr

Ella Kım 63 jasta. Bıdaıyq aýylyna 18 jasynda kelin bolyp túsken. Ella apa ándete júrip, úıdiń de, túzdiń de jumysyna úlgeredi. Ata-enesi qaldyryp ketken quryqty ómirlik jary Qaırolla Shıbkenov ekeýi myǵym ustap, jeke sharýashylyqtaryn dóńgeletip keledi.

Erli-zaıyptylar 3 bala tárbıelep ósirgen. Búginde 10 nemereniń ata-ájesi. Aıtpaqshy, qazaq otbasyna alǵash kelin bolyp túskende qos taraptyń da ata-anasy qarsy bolypty. Biraq Ella Kım úlkenderdiń senimine selkeý túsirmeı, aýyldyń qara qazanynda qaınap, barlyq jumysty úıirip áketken.

«Ákem basynda jylady. Aýyldy jerge kelin bolyp, qazaqqa qalaı turmysqa shyqqaly jatyrsyń dep. Salt-dástúrdi di bilmeısiń dep ýaıymdaǵan bolatyn. Men bolsam, «Papa, ýaıymdama. Jigitim jaqsy. Sharap ishpeıdi, shylym shekpeıdi» dep jubatqan edim. Atam men enem de qarsy boldy. Biraq úlken atam boldy. Sol kisi «Eshteńe etpeıdi. Kelin jaqsy bolsa barlyǵyn úırenedi áli» dep aıtqan. Bastapqyda shynymen qıyn boldy. Men sıyr saýa almaıtynmyn. Enem bir-eki ret kórsetti. Sodan birtindep úırenip aldym. Alty sıyr saýatynbyz sol kezde», - dep eske alady Ella Kım.

Ella Kım Saran qalasynyń týmasy. Ákesi Kım Tıan-Sen Ózbekstannan kóship kelgen. Birneshe jyl qyr astynda qara altyn óndirgen shahter. Kenshi Saran shahtasynda ýchaski basshysy bolyp eńbek etken. Al anasy saýda-sattyqpen aınalysypty. Otbasymyzben Qazaqstanǵa kóship kelgende eshkim bizdi jatsynbady. Qazaq pen káris ultyn biriktiretin de osy kishipeıildik deıdi, Ella apa.

«Kárister tamaqty da, kez-kelgen zatty da eki qolymen beredi. Qazaqtarda da solaı. Salt dástúrlerimiz uqsas keledi keı kezde. Maǵan qazaqtyń dástúrlerinen tusaý keser unaıdy. Sebebi sábıdiń alǵashqy qadamdaryn kórý úlken qýanysh», - deıdi Ella Kım.

Ella apa halqymyzdyń jón-joralǵysyn qazaqtan kem bilmeıdi. Ulttyq taǵamdar únemi dastarhanynan tabylady.

Sonymen qatar Ella Kım «Ájeler» ansambline jetekshilik etedi. 7 jyl buryn qurbysy Bıbinur Keıkenova ekeýi aýyldaǵy ónerge jaqyn qarııalardyń basyn bir arnaǵa toǵystyryp, shyǵarmashylyq joldy bastap ketken.

Ansambl quramyndaǵy ájelerdiń eń jasy 60 ta bolsa, eń úlkeni 70-ti alqymdaǵan. Aptasyna eki ret mádenıet úıine kelip, memlekettik mańyzdy sharalarǵa daıyndalady. Tipti jańa jyldyq keshterde túrli keıipkerlerdiń maskasyn kıip, balalardyń kóńil-kúıin kóterýge úles qosady.

Ella Kım sanaly ǵumyryn mádenıet salasyna arnaǵan jan. Jezqazǵan mýzykalyq kolledjinde bilim alyp, horeograf retinde Bıdaıyqtyń balalaryn bıge baýlyǵan. Osy aýyldyń mádenıet úıine jetekshilik etip, qazaq ónerin damytýǵa eńbegi sińgen.