«Qazaqııa 2015» blog-sapary bastaldy
ASTANA. QazAqparat - Búgin, 2015 jyldyń 11 sáýirinen Qaznette balamasy joq «Qazaqııa 2015» baıqaýyna qatysýshylar óz baǵytyndaǵy alǵashqy stansasy - Almaty qalasynda baıqaý saparyn bastap ketti.
Іrikteýden ótken blogerler toby aldyn ala qurǵan josparlary boıynsha ár stansadan áleýmettik jelilerde post jazýlary tıis.
«Qazaqııa 2015» - Qazaqstannyń birneshe oblysy men qalasyn qamtıtyn blog-sapar. Shart boıynsha baıqaý qatysýshylary 12 kún ishinde 12 stansany (Almaty, Saryózek, Úshtóbe, Aıagóz, Rıdder, Semeı, Aqsý-2, Ekibastuz, Temirtaý, Jańaarqa, Jezqazǵan, Astana) temir jolmen basyp ótedi. Blog-sapardyń maqsaty - elimizdi jańa qyrynan tanytyp, qazaqtildi ınternet keńistikti sapaly mátindik, beıne, foto, aýdıo kontentpen tolyqtyrý, dep habarlaıdy uıymdastyrýshylar.
Baıqaýdyń júlde qory - 1 mıllıon teńge.
Baıqaýǵa irikteý 26 naýryzdan bastalyp, alǵash ótinish bildirgen 50 shaqty adamnan ekinshi kezeńge 26-sy ótti, al úshinshi kezeńge 10 qatysýshy ǵana qaldy. Shoıyn jolmen bolatyn sapardyń ózi 11 sáýir men 22 sáýir aralyǵyna josparlanǵan.
Saıahat barysynda jazylǵan qatysýshylardyń eńbegi áleýmettik jelilerdegi (ásirese, Feısbýk) jazbasynyń tartymdylyq ındeksi (post, bólisý, laık, pikir) eskerile otyryp, qazylar alqasynyń qorytyndy sheshimimen anyqtalady. Qatysýshylar jazbasynyń formatyna (fotoreportaj, suhbat, vıdeo, t.s.s.) shekteý qoıylmaıdy.
