Qazaqy tazy — ulttyq brend: Brıýsselde arnaıy fotokórme ótip jatyr
ASTANA. KAZINFORM — Bıyldan bastap 3 qyrkúıek elimizde Qazaqy tazy men tóbet kúni retinde resmı túrde atalyp ótedi. Qazaqy tazy — halqymyzdyń jeti qazynasynyń biri ári úsh myń jyldyq tarıhy bar asyl tuqym.
Jýyrda Brıýsselde Qazaqstannyń mádenı murasyn tanystyrǵan alǵashqy Shanyraq Fest Brussels festıvali ótti. 8–11 sáýir aralyǵyndaǵy sharaǵa 500-den astam adam qatysyp, 40-tan asa qazaqstandyq ónerpaz Eýropa jurtshylyǵyna ulttyq ónerimiz ben salt-dástúrimizdi tanystyrdy.
Endi qazaqtyń taǵy bir ulttyq murasy — tazy men tóbetti Eýropada keńinen nasıhattaýdyń múmkindikteri qandaı?
Bul týraly Belgııadan tikeleı baılanysqa shyǵatyn «NOMAD» Ulttyq ańshylyq klýby» qoǵamdyq qorynyń múshesi Abzal Dosyman Jibek Joly telearnasynyń «Búgin.LIVE» baǵdarlamasynda aıtty.
Qazaqy tazy — júıriktigimen, qyraǵylyǵymen jáne ańshylyq qabiletimen erekshelenetin asyl tuqym. Onyń denesi yqsham, aıaqtary uzyn, al qulaǵy men quıryǵynda shashaq júni bolady. Tazy ıis arqyly emes, kóbine kózimen shalyp, ańdy jyldam qýyp jetedi. Minezi sabyrly, óte sezimtal ári ıesine adal.
Al qazaqy tóbet — iri deneli, kúshti ári qaısar kúzetshi ıt. Ol ejelden maldy qasqyr men basqa da jyrtqyshtardan qorǵaǵan. Tóbet qaýip tónbese orynsyz shabýyldamaıdy, biraq óz aýmaǵy men ıesin janyn sala qorǵaıdy. Tazy — ańshylyqtyń serigi bolsa, tóbet — tórt túliktiń aıbyndy saqshysy. Ekeýi de halqymyzdyń turmys-tirshiligimen bite qaınasqan ulttyq qundylyq.
— Erteńgi kúnniń mańyzy zor. Sebebi sońǵy jyldary qazaqy tazy týraly aqparattyq jumys keń kólemde júrgizilip keledi. «Nomad» ulttyq ańshylyq klýby jıyrma jylǵa jýyq ýaqyt boıy qazaqy tazyny jáne ulttyq ańshylyq dástúrin damytý baǵytynda jumys istep júr. Bizdiń basty maqsatymyz — qazaqy tazyny saqtap, onyń tuqymdyq erekshelikterin damytý jáne ony halqymyzdyń ulttyq brendine aınaldyrý, — dedi ol.
Spıker sózinshe, 3 qyrkúıek qazaqy tazy men tóbet kúnine oraı Belgııa astanasy Brıýssel qalasynda «Jelden de júırik — tazy» atty fotokórme ótip jatyr.
— «Nomad» ulttyq ańshylyq klýby qoǵamdyq qorynyń uıymdastyrýymen, Qazaqstan Respýblıkasynyń Syrtqy ister mınıstrligi men Qazaqstannyń Belgııadaǵy elshiliginiń qoldaýymen jáne Qazaqstan kınologııalyq odaǵynyń qatysýymen qazaqtyń ulttyq qundylyǵy — júırik tazyǵa arnalǵan fotokórme ótip jatyr, — dedi «NOMAD» Ulttyq ańshylyq klýby» qoǵamdyq qorynyń múshesi Abzal Dosyman.
Abzal Dosymannyń aıtýynsha, buǵan deıin osyndaı fotokórmeler Fınlıandııa, Túrkııa jáne Estonııa memleketterinde uıymdastyrylǵan. Mundaı is-sharalar qazaqy tazyny halyqaralyq deńgeıde keńinen nasıhattaýǵa jáne onyń ulttyq qundylyq retindegi mańyzyn tanytýǵa yqpal etedi eken.
— Eýropa elderinde qazaqy tazy men tóbetke degen qyzyǵýshylyq óte joǵary. Brıýsseldegi Qazaqstan elshiliginiń shaqyrýymen búgingi is-sharaǵa qatysýǵa nıet bildirgen qonaqtardyń qarasy qalyń. Atap aıtqanda, Halyqaralyq kınologııa federatsııasynyń atqarýshy dırektory arnaıy qatysý úshin kelip otyr. Sondaı-aq Belgııa ákimdiginiń ókilderi de bul sharaǵa úlken qyzyǵýshylyq tanytyp otyr, — dedi ol.
Belgııadan tikeleı qosylymǵa shyqqan Abzal Dosym erteńgi kúnmen barsha otandastaryn quttyqtady.
— Memleket basshysynyń qoldaýymen qazaqy tazy men tóbet tuqymdaryn saqtaý jáne damytýǵa baǵyttalǵan naqty sharalar qolǵa alynǵannan keıin, bizdiń de jumysymyzdy odan ári kúsheıtýge úlken múmkindik týdy. Osy ıgi iske atsalysyp júrgen barsha azamattarǵa alǵysymdy bildiremin. Búgingi aıtýly sharamen barsha otandastarymyzdy quttyqtaımyn! Qazaqy tazymyzdyń tuqymy kóbeıip, dańqy álemge jaıyla bersin, — dedi ol.
Aıta keteıik, elimizde 4 myńǵa jýyq tazy tuqymy resmı tirkelgen.
