Qazaqy ıt tuqymdarynyń ulttyq ortalyǵy qurylady
ASTANA. KAZINFORM – Taıaý ýaqytta Jetisý oblysynda Qazaqy ıt tuqymdarynyń ulttyq ortalyǵynyń qurylysy aıaqtalady. Ortalyq tazy men basqa da qazaqy ıt tuqymdaryn saqtaýǵa arnalǵan ǵylymı ári ınfraqurylymdyq bazaǵa aınalýy tıis.
BIZDIÑ ORTA podkastynda qonaq bolǵan Qazaqstan Kınologtar odaǵynyń prezıdenti Baýyrjan Serikqalıdyń aıtýynsha ortalyq jeke ıt ıeleri men áýesqoı ıt ósirýshilerdiń kúshi jete bermeıtin mindetterdi atqarmaq.
— Ulttyq ortalyq — eń aldymen, ınfraqurylymdyq turǵydan múlde basqa deńgeı. Sonymen qatar bul qazaqy ıt tuqymdaryn qoldaýǵa baǵyttalǵan ǵylymı-pedagogıkalyq deńgeıdegi ortalyq bolady, — dedi ol.
Mamannyń aıtýynsha, ortalyq jumysynyń negizgi baǵyttarynyń biri ǵylymı, onyń ishinde genetıkalyq deńgeıdegi zertteýler júrgizý bolady. Sondaı-aq bıomaterıaldardy krıokonservatsııalaý jáne bıobank qurý josparlanyp otyr.
Ortalyq tazynyń sapaly genofondyn qalyptastyrýda erekshe mańyzǵa ıe bolýy múmkin. Tuqymdy halyqaralyq deńgeıde túpkilikti moıyndatý úshin bir-birine jaqyn týystyǵy joq keminde segiz derbes tuqymdyq jeliniń bolýy qajet.
— Ulttyq ortalyq bul úderisti tikeleı baqylap, óz qaraýynda ıtterdi ustaı alady, ıaǵnı keminde segiz tuqymdyq jeliniń genofondyn saqtaıdy. Aıtalyq, osy turǵydan alǵanda, ulttyq ortalyq tuqym tazalyǵy men sapasynyń kepiline aınalýy múmkin, — dedi Baýyrjan Serikqalı.
Osy oraıda sarapshy basqa tuqymdarmen býdandastyrýǵa jol bermeý jáne tazynyń óz ishindegi genetıkalyq alýantúrlilikti saqtaý mańyzdy ekenin atap ótti.
Qazaqstan Kınologtar odaǵy ortalyq ıtteriniń quramyn tuqymyn qalyptastyrý úshin shyǵý tegi qujatpen rastalǵan, úsh býyndyq tolyq shejiresi bar, táýelsiz sarapshylardan joǵary baǵa alǵan ári densaýlyǵy jaqsy ıtterdi irikteýdi usynady.
Buǵan deıin sheteldik sarapshylardy qazaqy tazynyń qaı qasıeti qyzyqtyratynyn jazǵan edik.
