Qazaqy ıt tuqymdaryn saqtaýda qandaı jumys atqarylyp jatyr
QR Prezıdentiniń Іs basqarýshysy Aıbek Dádebaev ulttyq ıt tuqymdaryn saqtaýda qandaı jumys atqarylyp jatqanyn aıtty, dep habarlady Kazinform.
«Egemen el retinde ulttyq qundylyqtarymyzdy saqtaý jáne halyqaralyq deńgeıde nasıhattaý qashanda mańyzdy. Memleket basshysy tazy men tóbetti qorǵaý máselesine nazar aýdaryp, ony qolǵa alýdy byltyr Prezıdent Іs basqarmasyna tapsyrǵan bolatyn. Sodan beri birtalaı sharýa atqaryldy. Osy taqyrypqa qatysty memlekettik organdar ókilderimen kezekti kezdesýimizdi ótkizdik. Basqosýda Qazaqstan kınologtary odaǵynyń basshysy FCI-men baılanysty nyǵaıtý barysy týraly baıandady», - dedi Aıbek Dádebaev.
Ol 2024 jylǵy mamyr aıynda elordada Halyqaralyq ıtter kórmesin, sonyń aıasynda tazylardyń jeke kórmesin ótkizý josparlanyp otyrǵanyn jetkizdi. Oǵan FCI basshylyǵy kelip, elimizdiń kınologııa salasyndaǵy, onyń ishinde qazaqy ıt tuqymdaryn saqtaýǵa baǵyttalǵan jumyspen tanyspaq.
Tazy men tóbettiń standartyn jasaý da ózekti. Bul taza qandy qazaqy ıt tuqymdaryn anyqtaýǵa, olardyń statıstıkasyn júrgizýge negiz bolady. Tazyǵa qatysty kınologtar men ıtbegiler, ǵalymdar ortaq sheshimge keldi, al tóbettiń standartyna qatysty talqylaýlar jalǵasyp jatyr.
«Bıyl Genetıka jáne fızıologııa ınstıtýty tazynyń genofondyn anyqtaýǵa arnalǵan zertteýdi aıaqtady. Tóbetke qatysty osyndaı jumys kelesi jyly bastalady. Baıqap otyrǵandaryńyzdaı, keshendi jumysqa birqatar memlekettik organ men qoǵamdyq uıymdar atsalysyp jatyr. Jalpy, halqymyzdyń turmys-tirshiliginde qumaı tazy men tarlan tóbet erekshe oryn alǵany barshaǵa belgili. Sol úshin de babalarymyz ony jeti qazynanyń birine balaǵan. Ulttyq ıt tuqymdaryn saqtaý men qorǵaý baǵytyndaǵy jumys aldaǵy ýaqytta da júıeli túrde jalǵasady», - dedi QR Prezıdentiniń Іs basqarýshysy Aıbek Dádebaev.
Aıta keteıik, jaqynda Qasym-Jomart Toqaev ánshi Dımash Qudaıbergenge tazy kúshigin syılaǵan bolatyn.
«Dostar, tanysyp qoıyńyzdar, bul — meniń jańa dosym. Tabıǵattyń bul ǵajabyn, ıaǵnı tazy kúshigin maǵan Qasym-Jomart Kemeluly syılady. Tazy — bizdiń ultymyz úshin qundylyq, babadan qalǵan jeti qazynanyń biri. Qazirgi kúni Qazaqstanda tazyny saqtap qalýǵa jáne halyqaralyq dárejede moıyndaýǵa basa kóńil bólinip jatqany qýantady», - dep jazdy ánshi áleýmettik jelidegi paraqshasynda.
2024 jyly Astanada halyqaralyq tazylar kórmesi ótetini belgili boldy.
