«Kazakhstan open» golf-týrnıri Almatynyń betke ustar sporttyq sharasyna aınaldy - B. Baıbek (FOTO)
ALMATY. QazAqparat - Búgin Almatyda European Challenge Tour týrnırler serııasy aıasynda XI Halyqaralyq «Kazakhstan open» golf-týrnıriniń saltanatty ashylý rásimi ótti.
Oǵan álemniń ár túrli elderinen 132 golfshy qatysady. Olardyń ishinde Eýropalyq Chellendj týrdyń reıtıngi boıynsha alǵashqy júzdikke kiretin kásipqoı golfshylar bar.
«Almatyda osyndaı týrnırdiń ótip jatqandyǵy kóńil qýantady. Golftan álemdik deńgeıdegi kóptegen juldyzdar ózderiniń sporttyq jolyn osy týrnırden bastaǵan. «Qazaqstan oýpen» golf-týrnıri búginde Almaty ǵana emes, respýblıka deńgeıindegi betke ustar aıtýly sporttyq sharaǵa aınaldy», - dedi Almaty qalasynyń ákimi Baýyrjan Baıbek.
Ol sonymen qatar, memleket saıasatynyń arqasynda búginde halqymyzdyń 25 paıyzynyń sportpen belsendi túrde aınalysatyndyǵyn aıtty.
«Táýelsizdik jyldary taý shańǵysy, úlken tennıs, golf tanymal sport túrlerine aınaldy. Meniń ózim de bos ýaqytymda golf oınaýdy unatamyn. Sondyqtan, búgin bul jerde dos-jarandarymdy kórgenime qýanyshtymyn», - dedi qala basshysy.
Sonymen qatar Baýyrjan Baıbek úlken týrnır aldynda áýesqoılar arasynda ótkiziletin Pro-Am týrnıriniń jeńimpazdaryn marapattady. Oǵan 28 komanda qatysqan bolatyn.
Esterińizge sala ketelik, «Kazakhstan open-2015» týrnıriniń júldelik qory 45 myń eýrony quraıdy. Oıyndar halyqaralyq standarttarǵa saı, 18 alańshadan turatyn «Nurtaý» golf-klýbynda ótedi.
European Challenge Tour týrnırleri golfshylarynyń reıtıngi osy týrnırlerde alǵan syıaqylarynyń somasynan quralady. Sáıkesinshe, reıtıng boıynsha maýsym sońynda alǵashqy jıyrmalyqqa engender kelesi maýsymnan bastap, eýropalyq golftyń joǵarǵy lıgasy - European tour-da óner kórsetedi.
Al erteń, týrnır aıasynda kásipqoı golfshylardyń alǵashqy saıysy bastalady.
