«Kazakhstan for Animals» jobasyna Qazaqstannyń 20 óńirinen 1612 adam qatysty

ASTANA. KAZINFORM — 2025 jyly Mádenıet jáne aqparat mınıstrliginiń jáne «Azamattyq bastamalardy qoldaý ortalyǵy» KEAQ qoldaýymen Ulttyq volonterlik jeli «Kazakhstan for Animals» jobasyn júzege asyrdy, dep habarlaıdy mınıstrliktiń baspasóz qyzmeti.

Vedomstvo atap ótkendeı, jobanyń maqsaty — janýarlarǵa jaýapty ári gýmandyq kózqarasty nasıhattaý jáne zoovolonterlik mádenıetti damytý.  Jobaǵa Qazaqstannyń 20 óńirinen 1612 azamat qatysty. Bastama aıasynda jeti mektepte volonterlik klýbtar ashylyp, seriktes uıymdarmen birge 20-dan asa is-shara uıymdastyryldy.

— Volonterlerdiń múmkindikterin arttyrý maqsatynda bazalyq bilim berý baǵdarlamasy ázirlenip, oǵan qatysqan 886 adam oqýdy aıaqtady. Sonymen qatar, bastama aıasynda janýarlarǵa qamqorlyq taqyrybynda balalarǵa arnalǵan kitaptardyń, komıkster men anımatsııalyq týyndylardyń avtorlary arasynda shyǵarmashylyq baıqaý uıymdastyryldy. Bastama Qazaqstanda zoovolonterlik qozǵalysty ilgeriletýge jáne janýarlarǵa qamqorlyq mádenıetin nyǵaıtýǵa baǵyttalǵan taǵy bir mańyzdy qadam boldy, — delingen habarlamada.

Budan buryn «Jyl volonteri – 2025» halyqaralyq syılyǵynyń jeńimpazdary anyqtalǵanyn jazǵan edik.