Kazakhstan fashion week sán aptalyǵy bıyl jańa erejemen ótpek
ALMATY. QazAqparat - Almatyda ótetin Kazakhstan fashion week sán aptalyǵynyń bıylǵy 12-shi maýsymy jańa ereje boıynsha bolmaq. Bul joly asa qatań irikteýden ótken 9-aq dızaıner ǵana týyndylaryn usynatyn bolady, dep habarlady «QazAqparat» tilshisi.
«Kazakhstan fashion week» qazaqstandyq jáne shet el dızaınerleriniń sán aptalyǵy 18-20 qazan aralyǵynda «Qazaqstan» qonaqúıinde ótedi. Bıyl Qazaqstan men Grýzııa kollektsııalarynyń markalary tanystyrylady. Búgin arnaıy baspasóz máslıhatynda atalǵan jobanyń bas prodıýseri Saıat Dosybaev bıylǵy sharanyń basty jańalyǵyn aıtty.
«Bıylǵy sán aptalyǵyna qatysatyndar - naǵyz juldyzdar. Ózderin kásibı jaǵynan dáleldegen sheberler ǵana jarqyrap shyqpaq. Negizi, biz kollektsııalar sapasyn arttyrǵymyz keledi. Biraq, qazir ekiniń biri kıim tigip, ózin modeler atap júr. Olar kórsetilimderge qatysyp, ónimderin usynǵysy keledi, alaıda ol Qazaqstan sán áleminiń sapasyna keri áser etedi. Sán aptalyǵy aıasynda sheberlik klasy ótedi. Oǵan Temirbek Júrgenov atyndaǵy óner ınstıtýtynyń stýdentteri qatysady», - deıdi Saıat Dosybaev.
Bıylǵy sán aptalyǵy aıasynda, 17 qazan kúni Open way dástúrli jas dızaınerlerdiń halyqaralyq baıqaýynyń jeńimpazdary belgili bolady. Bıylǵy baıqaýǵa qatysýshylarǵa 2017 jyldyń kóktem-jaz maýsymy kıimder úlgisin tigý tapsyrylǵan. Oǵan qatysýǵa 300 ótinish bildirilgen.
«Qazylar alqasy 20 qatysýshynyń 40 syzbalyq jobasyn iriktep aldy. Fınalǵa ótkenderdiń arasynda qazaqstandyq, reseılik, qyrǵyzstandyq jas ónerpazdar bar. 5 apta boıy jas dızaınerler óz kollektsııalaryn tigip shyqty. Endi shyǵarmalaryn podıýmda kórsetetin bolady. Qazylar alqasy qatarynda Italııa dızaın ınstıtýtynyń dekany Andrea Tosı jáne Qazaqstan sán ındýstrııasynyń basty ókilderi bolady», - dedi Saıat Dosybaev.
Bıylǵy jeńimpazdardyń syılyǵy da aıtýly bolmaq. Uıymdastyrýshylardyń aıtýynsha, úzdik dızaıner kelesi Qazaqstan sán aptalyǵyna qatysýǵa jáne Italııa dızaın ınstıtýtynda tájirıbeden ótýge joldama alady. Jeńimpazdan bólek júldeli oryndarǵa ıe bolǵandar da Italııada bilim alýǵa sertıfıkat alady. Sonymen qatar, qatysýshylardyń barlyǵyna resmı seriktesterdiń syılyqtary tabys etiledi.
