Kazakhstan Fashion Week: Otandyq dızaınerler qandaı trend usynady
ALMATY. QazAqparat - Almatyda Kazakhstan Fashion Week 25-shi sán aptalyǵy esigin ashty, dep habarlaıdy QazAqparat tilshisi.
Respýblıka saraıynda ótip jatqan úshkúndik sharada Qazaqstannyń 17 dızaıneriniń, sondaı-aq Ózbekstan men Tájikstan sángerleriniń kıim úlgileri kórsetiletin bolady.
KFW shymyldyǵyn telejúrgizýshi, dızaıner Dınara Sátjan ashty.
«Qazaqstanda sán salasy damyp jatqanyna óte qýanyshtymyn. Básekeniń arqasynda damý bolatyny ras. Bizdiń elde stılıster, kosmetologtar, dızaınerler men vızajısterdiń qatary ósip keledi. Báseke sapa týdyrady. Marafonda sekildi munda adamdar óte kóp. Olardyń qaısysy máre syzyǵyna jetetinin ýaqyt kórsetedi. Men fashion-bıznespen aınalysa bastaǵanyma 8 jyl ótipti. Qazir baıqasańyzdar, otandyq dızaınerlerdiń kıimin kııý sánge aınaldy», - dedi Dınara Sátjan.
Dızaıner byltyr KSRO halyq ártisi Roza Baǵlanovanyń týǵanyna 95 jyl tolýyna oraı alǵashqy kollektsııasyn tanystyrǵan bolatyn.
Al bıylǵy toptamasynyń ıdeıasy «Taqııaly perishte» fılminen bastaý alyp otyr. Osyǵan oraı modelderdiń barlyǵy taqııa kıip shyqty.
Podıýmdaǵy sherýge Marat Bısenǵalıevtiń dırıjerligimen Almaty sımfonııalyq orkestri mýzykalyq súıemeldeý jasady. Kelesi dızaıner Toqtar Seıilbekov (Tosi) áıelderge arnalǵan pret-a-porter kolletsııasyn kórsetti. Al Tamara Lamanýkaeva keń jeńdi, jaket smokıngterin, keshki jıyn kıimderin kórsetti.
Alǵashqy kúndi dızaınerler Erlan Joldasbek, Arunaz Design men Alekseı Chjen qorytyndylady.
KFW 25 maýsym ishinde kókjıegin aıtarlyqtaı keńeıtti. Bıyl kórsetilimder Shymkent (26, 27 qazan), Aqtóbe (6, 7 qarasha) jáne Astana (21-23 qarasha) qalalarynda ótedi.
