Kazakhmys Jezqazǵandaǵy Quıý-mehanıkalyq zaýytyn jańǵyrtýǵa 10 mln dollar baǵyttamaq

NUR-SULTAN. QazAqparat – «Kazakhmys» korporatsııasy Jezqazǵan qalasynyń Quıý-mehanıkalyq zaýytynyń jumysyn qaıta jańǵyrtýǵa shamamen 10 mln dollar baǵyttaýdy josparlap otyr. Bul týraly «Kazakhmys» korporatsııasy quıý-mashına jasaý zaýytynyń basqarma tóraǵasy Jánibek Baıǵabylov málim etti, dep habarlaıdy QazAqparat tilshisi.

«Ónerkásipti damytý qorymen kelisimnen keıin Jezqazǵandaǵy Quıý-mehanıkalyq zaýytynyń óndirisin jańǵyrtýǵa shamamen 10 mln dollar jumsaýdy josparlap otyrmyz. Onda 700-ge jýyq adam eńbek etedi. Qazir zaýyt qaptama, quryshtar men sorǵylardyń korpýsyn sapaly shyǵarýǵa múmkindik beretin tehnologııamen jumys istep jatyr. Biz sapaly ónim shyǵarǵymyz keledi. Búgin kongreste Qazaqstannyń altyn óndirý ónerkásibin qamtamasyz etý men damytýdaǵy otandyq mashına jasaýshylardyń róli týraly baıandama jasadym. Altyn óndirýshiler arasynda jahandyq naryqta báseke joǵary. Bizdiń el altyn óndirý boıynsha álemde 12 orynda», - dedi Jánibek Baıǵabylov elordada ótip jatqan HІІ halyqaralyq taý-ken metallýrgııa kongresi barysynda.

Zaýyt basshysynyń aıtýynsha, altyn óndirýde sala alyptarymen básekege túsý úshin tıisti qural-jabdyq, bólshekter men materıaldar aýadaı qajet.

«Otandyq qymbat metaldardy óndirý salasy damysyn desek ımportqa táýeldilikti azaıtý kerek. Sonyń dáleli – pandemııa kezinde ımportty jetkizýge qatysty alýan suraq týyndady. Al qazir geosaıası jaǵdaıǵa baılanysty jetkizý boıynsha aıtarlyqtaı problema bar. Sondyqtan ózimizdiń mashına jasaý ónimdermen qamtamasyz etý mańyzdy. Bul – ulttyq qaýipsizdik», - deıdi ol.

Aıta keteıik, Nur-Sultan qalasynda HІІ halyqaralyq taý-ken metallýrgııa kongresi ótip jatyr.

Eki kúnge sozylatyn sharaǵa 13 memleketten ókilder qatysýda.