Kazakh TV arnasy 10 jasqa toldy

Búginde arna sandyq júıege ótip, Astanadaǵy «Qazmedıa ortalyǵy» teleradıo kesheninen habar tarata bastady. Bul týraly arnanyń baspasóz qyzmeti habarlap otyr.

Esterińizge sala keteıik, 2012 jyldyń 1 qyrkúıeginen bastap Caspionet arnasynyń ataýy Kazakh TV bolyp ózgertilgen bolatyn. Arna úsh tilde: qazaq, orys jáne aǵylshyn tilderinde álemniń 93 elinde, sonyń ishinde Soltústik jáne Ortalyq Amerıka, Batys jáne Shyǵys Eýropa, Soltústik Afrıka, Taıaý Shyǵys, Ortalyq Azııa jáne Ońtústik Kavkaz elderinde habar taratady. Arnanyń aýdıtorııasy 253 mln. adamdy quraıdy.

Sondaı-aq arnanyń «Habar» agenttiginiń qurylymyna kiretinin aıta ketken jón.

Aýdıtorııanyń negizgi bóligin elimizge kelgen qonaqtar quraıdy. Jáne basqa elderde turatyn qazaq dıasporasy da arnanyń turaqty kórermenderi. Onda folklordyq-tanymdyq baǵdarlamalar, ulttyq mýzyka, qazaq halqynyń salt-dástúrleri týraly baǵdarlamalar kóptep beriledi.

- Shetelderdegi qazaqtardyń kópshiligi bizdiń arnany qalt jibermeıdi dep senimmen aıta alamyn, - deıdi Norvegııanyń Oslo qalasynda turatyn Mahmed Bashtash esimdi qandasymyz. - Osy arna arqyly olar Qazaqstanda bolyp jatqan barlyq jańalyqtardan habardar bolyp otyrady. Sondaı-aq, qazaq tilindegi baǵdarlamalar ana tilimizdi umytpaýǵa kóp kómektesýde. Ásirese bul endi ósip kele jatqan jas býynǵa taptyrmaıtyn tárbıe.