«Kazakh Tourism» ulttyq kompanııasy týrızmdi qalaı damytpaq

ASTANA. QazAqparat - Qurylǵanyna jarty jyl bolǵan «Kazakh Tourism» ulttyq kompanııasynyń shtatynda búgingi kúni 40 adam bar. Basqarma tóraǵasy Rashıd Kúzembaev ol qyzmetkerlerdiń nemen aınalysatynyn aıtyp berdi, dep xabarlaıdy QazAqparat tilshisi.

"Kazakh Tourism" kompanııasynyń negizgi mıssııasy - Qazaqstannyń týrıstik áleýetin kóterý, osy saladaǵy ónimderdi xalyqaralyq naryqtarda keńinen nasıxattaý. 2023 jylǵa qaraı bizdiń kompanııa týrızm ındýstrııasynyń bedeldi múshesine aınalyp, osy salaǵa ınvestıtsııany kóptep tartatyn bolady", - dedi R.Kúzembaev búgin Şýchınsk-Býrabaı kýrorttyq aımaǵyn damytý máselelerine arnalǵan jıynda.

Onyń aıtýynsha, jańa kompanııanyń negizgi mindeti - týrızm salasyna aqsha tartý, qazaqstandyq ónimderge marketıng jasaý, aqparattyq-saraptamalyq jumys jasaý jáne osy saladaǵy sýbektilerdiń biliktiligin arttyrý.

"Týrızm salasyna ınvestıtsııa tartý jaǵynan úlken ári mańyzdy jobalarǵa basymdyq beriledi. "Kazakh Tourism" keıbir jobalardy birlesip qarjylandyrýdy da júrgizetin bolady. Biz birqatar úlken jobalardy anyqtadyq. Sonyń ishinde Şýchınsk-Býrabaı kýrorttyq aımaǵyna kiretin Úlken Shabaqty men Tekekól mańaıyndaǵy qurylystar da bar", - dep atap kórsetti kompanııa basshysy.

"Kazakh Tourism" kompanııasy Qazaqstannyń týrızm salasyndaǵy ulttyq ónimin qalyptastyrýǵa den qoıady. Ol úshin týrızmniń naqty tórt túrine basymdyq beriledi. Sonyń ishinde ekologııalyq jáne etnotýrızm bar. Sebebi elimizdiń baı tabıǵaty men xalqymyzdyń turmys salty arqasynda dál osy eki baǵytty jan-jaqty damytýǵa bolady.

Aıta keteıik, búgingi jıynda Býrabaıda ashylatyn jańa nysandar tanystyryldy. Al QR Mádenıet jáne sport mınıstri Arystanbek Muxamedıuly Býrabaıdy Las-Vegasqa aınaldyrýdyń jolyn usyndy.