Kazakh Tourism men Ózbekstannyń Ulttyq PR-ortalyǵy tarıhı memorandýmǵa qol qoıdy
ASTANA. KAZINFORM — KITF 2026 kórmesinde Kazakh Tourism men Ózbekstannyń Ulttyq PR-ortalyǵy arasynda tarıhı memorandýmǵa qol qoıyldy. Maqsat — Ortalyq Azııada týrıster úshin birtutas keńistik qurý. Bul týraly «Kazakh Tourism» kompanııasy málim etti.
Ne ózgeredi?
Shekara baǵytynda týrıstik avtobýstardy basymdyqpen (kezeksiz) ótýin pysyqtaý. Al marshrýttar boıynsha Jibek joly boıymen birlesken temirjol krýızderin iske qosý josparlanǵan. Sonymen qatar álemdik naryqta ortaq marketıngtik naýqandar júrgizilmek. Infraqurylym salasynda Astana men Tashkenttegi jańa qonaqúılerdi qoldaý kózdelgen.
— Bizdiń mindetimiz — kózge kórinbeıtin kedergilerdi joıý. Elderimiz arasyndaǵy saıahat barynsha kedergisiz ári jaıly bolýy tıis, — dedi Kazakh Tourism Basqarma tóraǵasy Talǵat Gazızov.
Kompanııa Ortalyq Azııany álemdik kartadaǵy úzdik baǵytqa aınaldyrý úshin resýrstardy biriktirýge daıyn ekenin jazdy.
Eske sala keteıik, buǵan deıin Týrızm jáne sport mınıstri Erbol Myrzabosynov elordada Mońǵolııanyń Mádenıet, sport, týrızm jáne jastar mınıstri Aldarjavhlan Jýkovpen kezdesken bolatyn. Mınıstr Qazaqstan men Mońǵolııa arasyndaǵy seriktestiktiń áleýeti joǵary ekenin atap ótip, ulttyq sport túrlerin damytý jáne halyqaralyq deńgeıde ilgeriletý baǵytyndaǵy ózara is-qımyldyń mańyzyna toqtaldy.
