Shańǵy, snoýbord, konkı: elimizdegi tanymal qysqy demalys oryndary
ASTANA. KAZINFORM — Qys túse salysymen taý shańǵysy kýrorttarynda demalýǵa degen qyzyǵýshylyq arta túsedi. Osy rette, «Kazakh Tourism» ulttyq kompanııasy týrıster úshin elimizdegi shańǵy, snoýbord jáne basqa da qysqy serýenge arnalǵan 13 lokatsııany usynady.
Almaty qalasy:
«Shymbulaq» — elimizdegi tanymal taý-shańǵy kýrorty. Uzyndyǵy 20 shaqyrymdy quraıtyn ártúrli deńgeıdegi trassalar, aspaly joldar, jalǵa berý pýnktteri bar. Munda Gınnestiń rekordtar kitabyna engen álemdegi eń bıik túngi shańǵy trassasyn kórýge bolady. Qosymsha belsendilikter: zipline, atqa miný, konkımen syrǵanaý, paraplanmen ushý.
«Pioneer» otbasylyq taý kýrorty ulttyq saıabaq aýmaǵynda 2000 metrden astam bıiktikte ornalasqan. Trassalardyń jalpy uzyndyǵy — 3000 metr. Olar áýesqoılar men tájirıbeli sportshylarǵa da qolaıly. Kýrort jyl boıy jumys isteıdi. Qosymsha belsendilikter: tabıǵı marshrýttar, otbasylyq baǵdarlamalar, jabdyqtardy jalǵa alý qoljetimdi.
Almaty oblysy:
«Oi-Qaragai» otbasylyq taý kýrortynda jalpy uzyndyǵy 28 shaqyrymdy quraıtyn 15 trassa bar. Aýmaǵynda meıramhanalar, qonaq úı jáne oıyn-saýyq alańdary qyzmet kórsetedi. Qosymsha belsendilikter: arqan saıabaǵy, at sporty ortalyǵy, sadaq atý, peıntbol, ekskýrsııalar.
«Aq Bulaq» ártúrli daıyndyq deńgeıine arnalǵan trassalar usynady, frıraıd úshin de qolaıly. Trassa uzyndyǵy 2500 metrge deıin jetedi, kóterilý ýaqyty 8–13 mınýt. Qosymsha múmkindikter: sanatorıı-kýrorttyq saýyqtyrý baǵdarlamalary, kvadrotsıklder.
Aqmola oblysy:
«Orman Ski Resort» Şýchınsk-Býrabaı kýrort aımaǵynda ornalasqan. Keshende jalpy uzyndyǵy 800 metrlik trassalar, kótergishter, keshki jaryqtandyrý, jabdyqty jaldaý jáne nusqaýshylar bar. Belsendilikter: shańǵy, snoýbord, tıýbıng, shanamen syrǵanaý, qaraǵaıly ormanda serýendeý.
«Elikti Park» Kókshetaý qalasynan 25 shaqyrym jerde Zerendi aýdanynda ornalasqan. Uzyndyǵy 4 shaqyrymǵa deıingi trassalar, býgeldi jáne kreseldi kótergishter, jabdyq jaldaý jáne qysqy oıyn-saýyq aımaqtaryn usynady. Belsendilikter: taý shańǵysy, snoýbord, tıýbıng, konkı tebý, taza aýada serýendeý.
«Nurtaý» bazasy Şýchınsk–Býrabaı kýrorttyq aımaǵynda ornalasqan. Trassa uzyndyǵy — 800 metr. Aspaly jol, men syrǵanaý oryndarymen jáne snoýtıýbtarǵa arnalǵan kótergishpen jabdyqtalǵan.
ShQO:
«Altaı Alpi» Óskemen qalasynan 24 shaqyrym jerde ornalasqan. Uzyndyǵy 4,5 shaqyrymǵa deıin jetetin 12 eńis bar. Jumys merzimi qarashadan sáýirge deıin jalǵasady. Nusqaýshylar qyzmeti, jalǵa berý pýnktteri qoljetimdi. Qosymsha belsendilikter: pantoterapııa, balyq aýlaý, atpen serýendeý, arqan saıabaǵy.
«Nurtaý» oblys ortalyǵynan 35 shaqyrym qashyqtyqta ornalasqan. Trassa uzyndyǵy — 2 000 metr. Qonaqtarǵa eki negizgi jáne bir oqý trassasy usynylady, frıraıd aımaqtary, kottedjder men balalar baqshasy qarastyrylǵan. Belsendilikter: tıýbıng, monsha, oshaq alańy, ekskýrsııalar.
Rıdder qalasy mańyndaǵy taý shańǵysy oryndary:
Stardust Camp — Verhnıaıa Harıýzovka aýylynda ornalasqan. Trassa uzyndyǵy 1 000 metr, býgeldi kótergishpen jabdyqtalǵan. Qonaq úı jáne glempıng bar. Qosymsha belsendilikter: tıýbıng, syrǵanaq.
«Edelveıs» — túrli deńgeıdegi trassalar, slalomǵa arnalǵan sertıfıkattalǵan túsý eńisteri bar. Trassa uzyndyǵy –1300 metr. Qosymsha múmkindikter: taýǵa shyǵý, konkımen syrǵanaý.
Túrkistan oblysy:
Jyl boıy jumys isteıtin «Alataý» kýrorty Tóle bı aýdanynyń Nysanbek aýylynda ornalasqan. Trassa uzyndyǵy — 1 800 metr. Belsendilikter: shańǵy, snoýbord, tıýbıng, qarda júrý kóligi, qarda júrýge arnalǵan arnaıy quraldar, atpen serýendeý marshrýttary.
Pavlodar oblysy:
«Myrzashoqy» taý shańǵysy bazasy Qarajar aýylyna jaqyn jerde ornalasqan. Trassa uzyndyǵy — 960 metr. Aspaly jol jáne jabdyq jaldaý pýnkti bar. Bazada turý qarastyrylmaǵan.
Qosymsha belsendilikter: tıýbıng, taza aýada serýendeý, qarda júrý kóligi, qysqy pıknıkter men ekskýrsııalar.
Eske sala ketsek, buǵan deıin Altaıdan Túrkistanǵa deıingi aýmaqtaǵy elimizdegi qysqy demalys oryndarynyń 7 baǵytyn usyndyq.