Kazakh Tourism bıýdjeti eki esege qysqardy, týrıster aǵyny azaıyp qalmady ma

ASTANA. KAZINFORM — «Kazakh Tourism» UK» AQ basqarma tóraǵasynyń orynbasary Danıel Serjanuly kompanııaǵa bólingen qarajattyń qanshaǵa qysqartylǵany jáne tıimdiligi jóninde tilshiler suraǵyna jaýap berdi.

− Bıyl bólingen qarajat taǵy 20 paıyzǵa qysqartyldy. Degenmen, bizdiń oıymyzsha bul qarajat jetispeıdi, sebebi onyń negizgi baǵyty — Qazaqstandy shetelge tanytyp, sol arqyly kóbirek týrıst tartý. Qazirgi qolda bar bıýdjetpen jylyna 3-4 kórmege qatysyp, Qazaqstannyń týrıstik operatorlaryn biriktirip, jańa seriktesterin taýyp, kóptep týrıst ákelýge yqpal etemiz. Ekinshiden, túrli áleýmettik jelide Qazaqstan týraly aqparatty kóbeıtý jumysy bar. Munyń barlyǵy jyldan-jylǵa úzbeı isteletin jumys. Sebebi álemdik básekeni qarasaq, kórshiles elderdiń marketıngtik shyǵyny 3-4 ese, keı elderde — 10 ese kóp. Bul álemniń týrıstik kartasyndaǵy báseke bolǵandyqtan, ondaǵy qabiletimizdi arttyrý mańyzdy, − dedi Danıel Serjanuly Úkimet úıinde ótken brıfıngte.

Onyń aıtýynsha, bıýdjet qarajaty naqty maqsattarǵa jáne naqty baǵyttarǵa jumsalady. Mysaly Qytaı, Úndistan, Japonııa, Malaızııa, Eýropadaǵy Germanııa, Italııa, arab elderinde jarnama júrgizilgen. Nátıjesinde bul elderden keletin týrıster sany jyldan-jylǵa ósip keledi.

Týrızm jáne sport vıtse-mınıstri Erjan Erkinbaevtyń aıtýynsha, bıyl «Kazakh Tourism» bıýdjeti 1,2 mlrd teńge boldy. Al 2019 jyly 3,2 mlrd teńge bolǵan.

− Basqa eldermen salystyrsaq, Ózbekstanda marketıngtik jarnamaǵa 9 mln dollar, Qyrǵyzstanda 12 mln dollar, Ázerbaıjanda 32 mln dollar, Grýzııada — 86 mln dollar jumsalady. Demek bizdiń bıýdjetimiz basqa elderden áldeqaıda tómen, biraq soǵan qaramastan nátıjelerimiz shamalas. Byltyr Ózbekstan 10,2 sheteldik týrısti qabyldady, olar shekaradan ótken sheteldiktiń bárin týrıst dep esepteıdi. Al biz jumys maqsatymen kelgenderdi qospaǵanda, elimizde bir táýlikten kóp ýaqytqa qalǵan týrısterimizdiń ózi — 10,4 mıllıon. Demek, bizdiń marketıngke baǵyttaǵan bıýdjetimiz óte az, biraq tıimdiligi joǵary, − dedi Erjan Erkinbekov.

Aıta keteıik, Týrızm jáne sport vıtse-mınıstri Qazaqstandaǵy demalystyń qymbattyǵyn básekeniń joqtyǵymen baılanystyrǵan edi.