«Kazakh Tourism» Býrabaıdy Antalııamen salystyrmaýǵa shaqyrdy
NUR-SULTAN. QazAqparat - Túrkııanyń demalys oryndary men Býrabaıdyń baǵasyn salystyrýǵa bolmaıdy. Bul týraly «Kazakh Tourism» ulttyq kompanııasy» AQ basqarma tóraǵasy Órken Bısaqaev aıtty, dep habarlaıdy QazAqparat.
«Demalys oryndarynyń baǵasyna kelsek, demalys qunyn maýsymǵa, týrıstik usynys qurylymyna, týrızm túrine jáne basqa da kóptegen faktorlarǵa baılanysty qarastyrý qajet. Mysaly, ushaq bıletterin aldyn ala satyp alý ushar aldynda satyp alǵan bıletterge qaraǵanda arzanǵa túsedi. Al kýrorttyq qonaqúı baǵasy maýsymǵa jáne tolyǵýyna oraı qubylady: árıne, naǵyz maýsymynda basqa maýsymǵa qaraǵanda baǵa joǵary bolady», - dedi primeminister.kz saıtynda suhbat bergen Ó.Bısaqaev.
Osy oraıda ol el ishinde demalý shetelde demalǵannan qymbatqa túsedi degen pikir bar ekendigin atap ótedi.
«Bul rette, kóbine Túrkııa men Býrabaıdyń baǵalaryn salystyrady. Bul eki nysan ınfraqurylymnyń damý deńgeıimen ǵana emes, týrıstik usynystarmen, týrıstik maýsymnyń uzaqtyǵymen jáne basqa da jaǵdaılarmen erekshelenedi. Bul oraıda Býrabaıdy Antalııamen salystyrýǵa bolmaıdy. Bulardyń bir-birinen aıyrmashylyqtary bar. Tipti baǵasy birdeı bolǵannyń ózinde olar bir-biriniń ornyn almastyra almaıdy», - dedi basqarma tóraǵasy.
Kompanııa basshysynyń atap ótýinshe, Býrabaı - bul sanatorıılik emdi esepke almaǵanda birkúndik týrlar, demalys kúnderi, qysqa merzimdi demalys ótkiziletin jer.
«Tipti, bul jaǵdaıda da kez kelgen qarjyǵa demalatyn oryn: shatyrlar men jeke úılerden bastap, besjuldyzdy qonaqúıge deıin tabýǵa bolady. Servıs deńgeıine baılanysty máseleler bar. Biraq bul ýaqyt pen básekeniń jetkilikti bolýyn talap etetindikten, birtindep jónge keletin másele», - dedi Ó.Bısaqaev.
