«Kazakh Tourism» basshysy: Qazaqstannyń ulttyq týrıstik brendin jasaýdyń eki joly bar
ASTANA. QazAqparat - Elimizdegi týrızmniń týy bolar Qazaqstannyń ulttyq týrıstik brendin jasaýdyń eki joly bar. Bul týraly Astanada tilshilerge arnalǵan baspasóz týrynda «Kazakh Tourism» UQ» AQ-nyń basqarma tóraǵasy Rashıd Kúzembaev málim etti, dep habarlaıdy «QazAqparat» HAA tilshisi.
«Qazaqstannyń ulttyq týrıstik brendin jasaýdyń qazir eki joly bar. Birinshiden, qoǵamnyń talqysyna salyp, BAQ pen ınternet arqyly daýys berý jolymen nemese sarapshylardyń daýysy arqyly anyqtaýǵa bolady. Qazirgi tańda Qazaqstannyń týrıstik brendin anyqtaý joldary talqylanyp jatyr. Jýyq arada belgileýge tyrysyp jatyrmyz. Sebebi, bul suraq kóp talqyny talap etetin másele. Jaýapkershilik óte úlken. Men osy kúnge deıin Qazaqstannyń ulttyq týrıstik brendi bolmaǵan dep aıtar edim. Sondyqtan, bul jeti ret ólshep, bir ret kesip, keńesip anyqtaıtyn sharýa», - deıdi Ulttyq kompanııa basshysy.
Jýyq arada sheshimin tabar sharýaǵa qanshalyqty qarajat kerek? Bul suraqqa Rashıd Kúzembaev jaýap berýge asyqpady.
«Qarajat kóp ketpeıdi. Eshqandaı mıllıondaǵan aqsha jumsalmaıdy. Bul brendti anyqtaǵan kezde qanshalyqty qarjy ketkenin naqty aıtatyn bolamyz», - dedi Rashıd Kúzembaev.
Aıta ketsek, tilshiler qaýymyna arnalǵan baspasóz týrynda Rashıd Kúzembaev Halyqaralyq alpınıster komandasy elordanyń 20 jyldyǵyna oraı Qazaqstandaǵy 20 shyńdy baǵyndyrýdy josparlap otyrǵanyn atap ótken bolatyn. Shyńnyń 20-sy ataýsyz bolady. Baǵyndyrylǵan sońǵy shyń «Astana» dep atalmaq. Bul baǵdarlarmen halyqaralyq alpınıster júrip ótedi. Olardyń qatarynda qazaqstandyq alpınıster de bolady.
