«Kazakh Tourism» astanada medıtsınalyq týrızmniń arnaıy ekonomıkalyq aımaǵyn qurýdy usyndy
«Sheteldik týrıst bizge kelýi úshin arnaıy halyqaralyq akkredıtatsııa bar. Elimizde akkredıtatsııadan ótken 8 medıtsınalyq mekeme bar bolsa, sonyń altaýy Nur-Sultanda ornalasqan. «Kazakh Tourism» óz jaǵynan sol mekemelerdiń qyzmetin alǵa jyljytyp, kórmelerge qatysýyna, aqparattyq týrlar uıymdastyrýyna qoldaý kórsetedi. Sondaı-aq, sheteldik týrıstik kompanııalarmen baılanysty jolǵa qoıýǵa kómektesemiz. Oǵan qajetti alǵysharttar bar. Óıtkeni baǵa saıasaty óte qolaıly, ortasha túbirtek kóńilge qonymdy bolyp shyǵady. Sondaı-aq, tabıǵattyń árkelkiligi otalar men kúrdeli em alǵannan keıin densaýlyqty ońaltýǵa yńǵaıly», - dedi Talǵat Amanbaev elordada ótken dóńgelek ústelde.
Sonymen qatar, ol salany damytýǵa baǵyttalǵan naqty usynys aıtty.
«Ákimdik pen Ulttyq ekonomıka mınıstrligine atalǵan 6 medıtsınalyq mekeme aıasynda medıtsınalyq týrızmdi damytýdyń arnaıy ekonomıkalyq aımaǵyn qurýdy usynamyz. Ol ekonomıkalyq aımaqta qosymsha qun salyǵy 0 paıyz deńgeıinde bolýy kerek dep otyrmyz. Salany damytý úshin shetelden bilikti mamandar kelip, jergilikti kadrlardy úıretýi kerek. Ol úshin sheteldik jumysshylardy ákelýge vıza jaǵynan jeńildik kerek. Jańa salynatyn nysandarǵa ınfraqurylym shyǵyndaryn óteý boıynsha kómek qajet. Sonyń bárine ákimdik nemese Úkimet kómektesse, úlken jeńildik bolar edi. Sebebi ınfraqurylymǵa jumsalatyn qarjy medıtsınalyq týrızm nysanyn salýǵa ketetin shyǵynnyń 50 paıyzyn alady», - dedi ulttyq kompanııa basshysy.
