Kazakh Quartet alǵash ret Brıýsselde óner kórsetti
BRıÝSSELЬ. QazAqparat - Ǵazıza Jubanova atyndaǵy Memlekettik ishekti aspaptar kvarteti alǵash ret Brıýsseldegi BOZAR óner ortalyǵynyń sahnasynda óner kórsetti, dep habarlaıdy QazAqparattyń menshikti tilshisi.
Jumanyń keshinde Belgııa jurtshylyǵy skrıpkanyń syzyltqan názik úni men vıoloncheldiń adam janyn eliter akkordtaryna qulaq quryshyn qandyrý múmkindigine ıe boldy. Qazaqstandyń vırtýozdardyń óneri kún ilgeri gollandtyń Maastrıht qalasynyń turǵyndaryn tánti etken bolatyn.
«Kóptegen mamandardyń pikirinshe, bizdiń kvartet álemniń úzdik jıyrma kvartetiniń qataryna kiredi», - deıdi Belgııa astanasyndaǵy kontsertti uıymdastyrǵan «S.Y.» qaıyrymdylyq qorynyń qaıratkeri Alan Shıshanovıch.
Aıtpashqy, «S.Y.» qory bıletten alynǵan tabystardy túgel Qazaqstandaǵy klassıkalyq mýzyka talanttarynyń bilim alýyna qoldaý kórsetýge jumsaldy.
Óner keshinde qazaqstandyq mýzykanttar kontserttiń shymyldyǵyn Iozef Gaıdnnyń jetpis altynshy kvartetiniń ekinshi bóligimen ashty. Aýstrııalyq kompozıtordyń 65 jasynda jazǵan osy týyndysynyń ekinshi bólimi mınorda jazylǵan birden-bir shyǵarma bolyp tabylady.
Ǵazıza Jubanova atyndaǵy Memlekettik ishekti aspaptar kvarteti joǵary deńgeıli óner kórsetip kele jatqanyna otyz jyldan asty. Oryndaýshylar Valentın Berlınskıı, Raıner Shmıdt syndy kvartet janrynyń naǵyz sańlaqtarynan óner syryn úırengen.
«Bizdiń kvartet 1988 jyly, Ahmet Jubanov atyndaǵy daryndy balalar mýzyka mektebiniń sahnasynda qurylǵan. Biz sol kezde synyptastar bolyp aspapta oınaıtynbyz», - deıdi kórkemdik jetekshi Ernar Myńtaev.
Eýropaǵa týrne uıymdastyrýlaǵy maqsat - álemniń túrli elderinde qoshemetke bólengen otandyq ónerpazdardyń sheberligin Kári qurlyqqa da tanytý.
Kontserttiń ekinshi bóliminde tanymal kompozıtor Felıks Mendelsonnyń №44 týyndysynyń birinshi bóligi oryndaldy.
«Eýropada Mendelson týyndylaryn tek qana eýropalyqtar oryndaı alady degen jańsaq pikir bar. Biz sol pikirden aryltý úshin Mendelsondy tańdadyq. Bizdi tyńdap kórgen soń, qanshalyqty durys oryndaǵanymyzǵa tań qalysty», - deıdi Alan Shıshanovıch.
Brıýsseldegi kontserttiń úshinshi bóliminde tanymal qazaq kompozıtory Ǵazıza Jubanovanyń №1 ishekti kvarteti oryndaldy. Uly dalanyń eýropalyq aspaptarmen jańǵyrǵan dástúrli mýzyka elementteri tyńdarmandardy beı-jaı qaldyrmady.
Kontsert sońynda birneshe mınýtqa sozylǵan qoshemetke rızashylyq retinde uly Abaıdyń «Aıttym sálem, qalamqas» áni men halyq kompozıtory Qurmanǵazynyń «Adaı» kúıin de shyrqap berdi.
«Kontsert men úshin erekshe jańalyq boldy. Sizderdiń kompozıtorlardyń klassıkalyq týyndylaryn buryn tyńdap kórmep edim. Qazaq klassıkteriniń týyndylary meni darhan dalaǵa eltip áketip, ózimdi jylqy úıirleriniń arasynda júrgendeı sezimde boldym», - deıdi Maltanyń Belgııadaǵy qurmetti konsýly Jo de Braband.
«EO jáne Ortalyq Azııa arasyndaǵy qatynastardy nyǵaıtý» (SEnECA) úkimettik emes uıymynyń baqylaý keńesiniń múshesi, Ortalyq Azııa jónindegi sarapshy Per Borgolts te osyndaı áserge bólengeni kórinip turdy.
«Ǵazıza Jubanovanyń mýzykasyn tyńdaı bastaǵannan-aq astymdaǵy kilem ushaqqa aınalyp, qazaq dalasyna ushyryp áketkendeı boldy. Osy mýzyka elińizdiń asqaq rýhyn tamasha jetkizgen», - deıdi ol.
Aıta keteıik, Ǵazıza Jubanova atyndaǵy Memlekettik ishekti aspaptar kvartetiniń Eýropa sapary munymen aıaqtalmaıdy. 21 mamyrda kvartet ujymy Gaagada, qazan aıynda Venanyń úzdik kontsert zaldarynyń birinde óner kórsetedi.
Avtor: Tımýr Dúısekeev
