Kazakh Invest Ystanbul men Vashıngtonda keńse ashty
ASTANA. QazAqparat - «KAZAKH INVEST» kompanııasy birqatar sheteldik iri qalalarda front-ofısterin ashty.
Bul týraly Úkimettegi baspasóz máslıhatynda QR Syrtqy ister mınıstriniń birinshi orynbasary Muhtar Tileýberdi málim etti, dep habarlaıdy QazAqparat.
«Ózderińizge belgili, 2005 jyldan bastap Qazaqstanǵa 247 mlrd dollar tikeleı sheteldik ınvestıtsııalar tartyldy. Elimizdiń sheteldegi mekemeleri osy jumysqa atsalysýda. Jalpy, búginde shet elderde Qazaqstan Respýblıkasynyń 92 mekemesi qyzmet etedi, onyń ishinde 57 elshilik, 4 turaqty ókildik, 3 dıplomatııalyq mıssııa, 11 bas konsýldyq jáne 17 konsýldyq jumys isteýde. Osyǵan qosa, 64 elde Qazaqstannyń 103 qurmetti konsýldary qyzmet atqarady. Olar da ınvestıtsııalardy tartý men eksportty ilgeriletý boıynsha turaqty túrde qyzmet etedi»,-dep toqtaldy M. Tileýberdi.
Buǵan qosa, ınvestıtsııalardy tartý turǵysynda QR Úkimeti jumysty kúsheıtýde basymdyq berilgen 10 elde Qazaqstan elshilikterinde ınvestıtsııalar jónindegi arnaıy keńesshilerdi taǵaıyndaý týraly sheshim qabyldaǵanyn eske salǵan jón.
«Sonymen qatar Vashıngton, Beıjiń jáne Ystanbul qalalarynda «KAZAKH INVEST» kompanııasynyń front-ofısteri ashyldy. Qazirgi ýaqytta osyndaı keńselerdi Shanhaı, Parıj, Dýbaı jáne Máskeý qalalarynda ashý pysyqtalýda»,- dedi ol.
