«Kazakh Invest»-tiń sheteldegi ókildikteriniń sany artady
ASTANA. QazAqparat - «Kazakh Invest» ulttyq kompanııasy sheteldegi ókildikter sanyn arttyrýdy josparlaýda. Bul týraly búgin Úkimet úıinde ótken baspasóz máslıhatynda «Kazakh Invest» Ulttyq kompanııasy basqarmasy tóraǵasynyń orynbasary Birjan Qaneshev aıtty, dep habarlaıdy QazAqparat.
«Úkimet sheshimi boıynsha 7 elde ókildigimiz bekitilgen. Jumysqa kiristi, jasap jatyr. Qosymsha qaı elderde ashý kerektigi qaralý ústinde. «Kazakh Invest» kompanııasynyń korporatıvtik strategııasyn daıyndap jatyrmyz. Ony Úkimetke usynamyz. Sol qujatta qandaı jumystar júkteletindigi, taǵy qandaı basymdyqtar bekitiletindigi belgili bolady. Sodan keıin ókildik ashylatyn elderdi usynamyz", - dedi ol BAQ ókilderiniń saýalyna oraı.
QR IDM Investıtsııa komıteti tóraǵasynyń orynbasary Larısa Jumaǵalıevanyń aıtýynsha, «Kazakh Invest» kompanııasynyń ókildikterinen bólek 10 eldegi Qazaqstan Elshiliginde ınvestıtsııalar jónindegi keńesshi jumys isteıtin bolady.
«Qazirgi tańda úsh Elshilikte keńesshi bekitilgen, qalǵandary bekitilý ústinde. Olardyń jumysy - ulttyq kompanııamen birlesip nemese ulttyq kompanııa ókilderi joq jerde ınvestorlarmen tikeleı kezdesý, kelissózder júrgizý, Qazaqstan týraly, elimizdegi ınvestıtsııalyq ahýal jaıynda aqparat berý. Al keńesshi joq Elshilikterimizde bul jumystar dıplomatııalyq ókildigimizdiń ekonomıka baǵytyndaǵy mıssııasyna júktelgen. Jalpy, bul baǵyttaǵy jumystardy elimizdiń Syrtqy ister mınıstrligimen birge júrgizip jatyrmyz», - dedi Larısa Jumaǵalıeva.
