KAZAKH INVEST ındýstrııalyq aımaqta ınvestıtsııa tartýdyń jańa tetigin iske qosady
ASTANA. KAZINFORM – Qazaqstanda ındýstrııalyq aımaqtardy jedel damytýǵa jáne ınvestorlardyń uzaq merzimdi qatysýy úshin turaqty jaǵdaılar qalyptastyrýǵa baǵyttalǵan «Qoljetimdilik úshin tólem» atty ınvestıtsııa tartýdyń jańa tetigi engizildi.
Pılottyq joba Batys Qazaqstan oblysynda «Eýrazııa» transshekaralyq saýda ortalyǵy» ındýstrııalyq aımaǵynyń aýmaǵynda iske asyrylýda, munda sheteldik ınvestorlardyń qatysýymen 17 ınvestıtsııalyq jobany iske qosý josparlanyp otyr.
Jańa tetik ınjenerlik ınfraqurylymdy ınvestordyń qarajaty esebinen salýdy, keıin obektiler paıdalanýǵa berilgennen keıin ındýstrııalyq aımaqtyń qatysýshylary men memleket tarapynan shyǵyndardy kezeń-kezeńimen óteýdi kózdeıdi. Mundaı tásil óndiristerdi iske qosý merzimderin qysqartýǵa, bıýdjetke túsetin júktemeni azaıtýǵa jáne halyqaralyq standarttarǵa sáıkes keletin ınfraqurylymdy qamtamasyz etýge múmkindik beredi.
«Qoljetimdilik úshin tólem» tetigin engizý nátıjege jáne aýqymdaýǵa baǵdarlanǵan, ınvestıtsııalar úshin túsinikti ári boljamdy jaǵdaılar qalyptastyrady.
Pılottyq jobany iske qosý aıasynda Batys Qazaqstan oblysynyń ákimi Narıman Tóreǵalıevtiń atynan Batys Qazaqstan oblysynyń ákimdigi men «KAZAKH INVEST» UK» AQ basqarma tóraǵasy Sultanǵalı Kenjequlovtyń atynan «KAZAKH INVEST» UK» AQ arasynda ózara yntymaqtastyq týraly memorandýmǵa qol qoıyldy. Qujat ındýstrııalyq aımaq aýmaǵynda ınvestorlardy tartý jáne jobalardy iske asyrý boıynsha taraptardyń ózara is-qımylyn bekitedi.
«KAZAKH INVEST» UK» AQ ındýstrııalyq aımaqtyń operatory retinde áreket etedi jáne ınvestorlardy súıemeldeýdi, basqarý men jobalardy úılestirýde úzdik halyqaralyq tájirıbelerdi engizýdi qamtamasyz etedi.
«KAZAKH INVEST» UK» AQ jumysynyń nátıjesinde tartylǵan kompanııalar jalpy quny shamamen 370 mln AQSh dollaryn quraıtyn, 1 500-den astam jumys ornyn qurýdy kózdeıtin 17 ınvestıtsııalyq jobany iske asyrý jónindegi bekitilgen Jol kartasyna engizildi. Qurylys materıaldary, metall konstrýktsııalary, hımııa jáne jeńil ónerkásip, ónerkásiptik ınfraqurylym men energetıka, ındýstrııalyq-logıstıkalyq qyzmetter salalarynda óndiristerdi iske qosý josparlanyp otyr.
Batys Qazaqstan oblysy damyǵan gaz jáne kólik ınfraqurylymy, tıimdi geografııalyq ornalasýy jáne joǵary tranzıttik áleýeti bar óńir retinde pılottyq joba úshin tańdaldy.
Pılottyq jobany iske asyrý qorytyndysy boıynsha «Qoljetimdilik úshin tólem» tetigin Qazaqstannyń basqa óńirlerinde masshtabtaý josparlanyp otyr.
— Bul tetikti iske qosý jyldam, ashyq jáne nátıjege baǵdarlanǵan jańa ınvestıtsııalyq modeldi qalyptastyrady. Biz ınvestordyń «taza alańǵa» emes, aldyn ala daıyndalǵan ónerkásiptik alańǵa kelýine jaǵdaı jasap otyrmyz, — dep atap ótti «KAZAKH INVEST» UK» AQ basqarma tóraǵasy Sultanǵalı Kenjequlov.
Jobany iske asyrý óńirge ınvestıtsııalar aǵynyn, jańa jumys oryndarynyń qurylýyn, salyq bazasynyń ósýin jáne zamanaýı ónerkásiptik ınfraqurylymnyń damýyn qamtamasyz etedi.