Qazaqfılmniń halyqaralyq kınoındýstrııadaǵy eski dańqyn qaıtarýǵa múddelimin — Aıda Balaeva

ASTANA. KAZINFORM — QR Mádenıet jáne aqparat mınıstri Aıda Balaeva «Qazaqfılm» kınostýdııasynyń qazirgi jaı-kúıi týraly pikir bildirip, memlekettik qoldaýǵa úmitker kınojobalar baıqaýy ózgeretinin aıtty.

Mınıstr «Kınematografııa týraly» zańǵa ózgerister engizý josparlanǵanyn atap ótti. Onyń ishinde Sh. Aımanov atyndaǵy «Qazaqfılm» kınostýdııasyna memlekettik qoldaý kórsetý jumysy bastalady.

«Bul jerde kópshiliktiń kókeıinde júrgen suraq — „Qazaqfılmniń“ qazirgi jaı-kúıi. Men mınıstr retinde „Qazaqfılmniń“ halyqaralyq kınoındýstrııadaǵy burynǵy dańqy men statýsyn qaıtarýǵa múddelimin. Bul — biz úshin jaýapty is ári qasterli mindet. Buǵan qatysty Memleket basshysynyń tapsyrmasy tıisti deńgeıde júzege asýda. Kim, qanshalyqty Qazaqfılmniń bolashaǵyna kúmánmen qarasa da, bizdiń aıtarymyz bireý — Qazaqfılm qatardaǵy kınostýdııa emes, bul bizdiń tarıhymyz, rýhymyz, ulttyq kınomyzdyń keleshekke degen úkili úmiti. Sondyqtan da ony saqtap qana qoımaı, qaryshtap damýyn qamtamasyz etemiz», — dedi A. Balaeva Qazmedıa ortalyǵynda mınıstrliktiń alqa otyrysynda.

Sonymen birge, Ulttyq fılmderdi memlekettik qoldaý ortalyǵynyń qurylǵandyǵyna 5 jyl boldy. Osy ýaqytta 5 pıtchıng ótip, 100 fılm túsirilgen.

«Alaıda fılm taqyryptarynyń birjaqtylyǵyn baıqaýǵa bolady. Máselen, asharshylyq, soǵys, nashaqorlyq taqyrybynda fılmder basym bolyp tur. Bıyldan bastap memlekettik qoldaýǵa úmitker kınojobalardy konkýrstyq irikteý erejesi ózgerdi. Ulttyq kınony qoldaý ortalyǵy aldymen stsenarıılerdi qabyldap, úzdikterin saraptama keńesi irikteıdi. Ulttyq múddemizge, ıdeologııamyzǵa saı keletin basym taqyryptar bekitilip, jaqyn arada jańa formattaǵy konkýrs jarııalanady», — dep túsindirdi Mádenıet mınıstri.