«Qazaqfılmdi» saqtap qalý úshin zańnamalyq deńgeıde qoldaý sharalary qabyldandy – Aıda Balaeva
ASTANA. KAZINFORM - Almatyǵa jumys sapary barysynda QR Premer-mınıstriniń orynbasary – Mádenıet jáne aqparat mınıstri Aıda Balaeva qala ákimi Darhan Satybaldymen birge otandyq kıno óneriniń tarıhyna arnalǵan taqyryptyq saıabaq qurý jobasymen tanysty. Bul týraly Úkimettiń baspasóz qyzmeti habarlady.
Sapar barysynda «Qazaqfılm» kınostýdııasynyń qazirgi jaı-kúıi men óndiristik áleýetine nazar aýdaryp, aldaǵy damý josparlary atalyp ótti.
Kınostýdııa aýmaǵyn damytý máselesine erekshe nazar aýdaryldy. Almaty ákimdigi 5,5 gektar aýmaqta otandyq kıno óneriniń tarıhy men kıno salasynyń kórnekti qaıratkerlerine arnalǵan zamanaýı taqyryptyq saıabaq qurýdy josparlap otyr.
Saıabaq aýmaqtyń mádenı jáne týrıstik tartymdylyǵyn arttyratyn ashyq qoǵamdyq keńistik retinde boı kótermek. Kelýshiler otandyq kıno óneriniń tarıhymen, kınostýdııanyń qyzmetimen jáne mýzeı ekspozıtsııalarymen tanysa alady.
Keleshekte bul saıabaq otandyq kınematografıster men mádenıet jáne óner qaıratkerleriniń qatysýymen mádenı-aǵartýshylyq is-sharalar ótkiziletin qosymsha alańǵa aınalýy múmkin.
– Ókinishke qaraı, biz ulttyq kınostýdııamyzdan aıyrylyp qala jazdadyq. Ony qoldan bankrottyqqa jetkizýge tyrysyp, is júzinde qatardaǵy prodıýserlik kompanııamen teńestirip qoıǵan edi. «Qazaqfılmdi» saqtap qalý úshin zańnamalyq deńgeıde qoldaý sharalary qabyldandy. Sonyń ishinde kınostýdııany memleket tarapynan tikeleı qarjylandyrý da kózdelgen. Búginde aýmaqty abattandyrýǵa erekshe kóńil bólinip otyr, al kelesi jyly pavılondardy jóndeýge kirisý josparlanǵan. Saıabaq aýmaǵynyń qazirgi jaǵdaıy qandaı ekenin ózderińiz de kórip otyrsyzdar. Kınostýdııa aýmaǵyn keń kólemde abattandyrý jáne kógaldandyrý jumystaryn júrgizý jóninde sheshim qabyldaǵan Almaty ákimine shynaıy alǵysymdy bildiremin. Nátıjesinde «Qazaqfılm» aýmaǵy otandyq kıno óneriniń tarıhyna arnalǵan taqyryptyq pavılondary bar, otbasylyq demalysqa qolaıly zamanaýı keńistikke aınalýǵa tıis, – dedi Aıda Balaeva.
Sonymen qatar Mádenıet jáne aqparat mınıstrligi «Qazaqfılmmen» birlesip, kınostýdııa aýmaǵynyń qalǵan bóligin keshendi jańartý máselesin pysyqtap jatyr. Bul jumystar ǵımarattar men ınjenerlik jelilerdi kúrdeli jóndeýdi, sondaı-aq aýmaqty abattandyrýdy qamtıdy.
Budan bólek, kınostýdııa jeke prodıýserlik kompanııalarmen yntymaqtastyqty jalǵastyryp, óndiristik bólimshelerdiń tıimdiligin arttyrý baǵytynda jumys júrgizip keledi. Jańǵyrtý aıasynda rekvızıtter men jabdyqtardy tsıfrlandyrý jobasy júzege asyrylyp jatyr. Sońǵy 15 jylda alǵash ret demeýshilik qarajat esebinen ishinara árleý-jóndeý jumystary júrgizildi.
Almatyda «Qazaqfılm» jerine qatysty taǵy daý shyqqanyn jazǵan edik.
