«Qazaqfılm» jeriniń satylýy, kınostýdııany Astanaǵa kóshirý: mınıstr pikir bildirdi

ASTANA. KAZINFORM – Mádenıet jáne aqparat mınıstri Aıda Balaeva «Qazaqfılm» kınostýdııasyna qatysty pikir bildirdi.

— Keıingi ýaqytta «Qazaqfılm» kınostýdııasy qoǵamda qyzý talqyǵa túsip, túrli qaýesetter men joramaldar aıtylyp jatyr. Jurtshylyqtyń «Qazaqfılmniń» taǵdyryna osynsha alańdaýshylyq bildirip otyrǵany qýantady. Sondyqtan qoǵamdaǵy osy alańdaýshylyqqa sebep bolyp otyrǵan máselelerge qatysty túsinikteme berýdi jón dep sanaımyn, — dep jazdy mınıstr áleýmettik jelidegi paraqshasyna.

Aıda Balaeva «Qazaqfılm» jeriniń satylýy jónindegi qaýeset birjola toqtatylýy tıis ekenin atap ótti.

— Eń aldymen aıtarym, kıno salasyna qatysy bar tulǵalardyń kınostýdııa tóńiregindegi protsesterge qatysty óz pikirin bildirýge quqyǵy bar. Alaıda aqparat taratqanda tek faktilerge súıenýge keńes beremin. «Zań men tártip» qaǵıdaty barshaǵa ortaq, al ony elemeý tıisti zań aıasynda jaýapkershilikke ákelip soǵady. Birinshi. «Qazaqfılm» jeriniń satylýy jónindegi aqparatqa qatysty. Bul másele tóńiregindegi negizsiz qaýeset birjola toqtatylýy tıis. «Qazaqfılmge» tıesili jerler kınostýdııa ıeliginde qala beredi. Jer satylǵan joq jáne tek kınematografııa múddesi úshin paıdalanylyp otyr, — dedi ol.

Mınıstr kınostýdııany Astanaǵa kóshirý bul da alyp-qashpa áńgime ekenin atap ótti.

— Ekinshi. Kınostýdııany jóndeýge qomaqty qarjy salýǵa daıyn ınvestorlardyń bar ekeni jaıly. Bul aqparat qoǵamda keń tarap júr, alaıda mundaı málimdemelerdi qujattarmen nemese naqty kepildiktermen rastaı almaıtyn adamdar jasap otyr. Memleket, ıaǵnı Mádenıet jáne aqparat mınıstrligi naqty ınvestorlarmen jumys isteýge daıyn. Degenmen ázirge eshqandaı naqty usynys, birde-bir kepildik haty joq. Barlyǵy tek áńgime deńgeıinde. Úshinshi. Kınostýdııany Astanaǵa kóshirý týraly. Bul da eshqandaı negizi joq qaýeset. Qazirgi ýaqytta elordaǵa «Qazaqanımatsııa» shyǵarmashylyq birlestigin kóshirý múmkindigi qarastyrylyp jatyr. Munda mańyzdy jaıt — «Qazaqanımatsııa» óndiristik baza emes, anımatsııalyq kontent jasaýǵa tapsyrystardy bóletin qurylym. Sondyqtan onyń Astanaǵa kóshýi salanyń jumysyna esh kedergi keltirmeıdi, — dedi Balaeva.

Aıda Balaeva bes jylda elimizde sapaly anımatsııalyq fılmder túsirilmegenin aıtty.

— Ókinishke qaraı, keıingi bes jylda elimizde sapaly anımatsııalyq fılmder túsirilgen joq. Osyǵan baılanysty anımatsııalyq ındýstrııany Kreatıvti ındýstrııalar qorynyń aıasynda damytý oryndy bolmaq. Qor qurylymynda anımatsııany damytýǵa baǵyttalǵan kreatıvti hab jasaqtalýda, — dedi Aıda Balaeva.

Ol «Qazaqfılm» — jaı ǵana kınostýdııa emes, bul — qazaq mádenıetiniń sımvoly ekenin atap ótti.

— Qurmetti dostar, Búginde qazaqstandyq kınoındýstrııada mańyzdy ári oń ózgerister oryn alýda. «Qazaqfılm» — jaı ǵana kınostýdııa emes, bul — qazaq mádenıetiniń sımvoly. Sondyqtan ony damytý — basym baǵyttyń biri. Prezıdent qol qoıǵan jańa zańǵa sáıkes elimizde fılmderdi qarjylandyrýdyń jalpy kóleminiń keminde 30%-y jyl saıyn tikeleı «Qazaqfılmge» baǵyttalatyn bolady. Bul kınostýdııa jumysynyń tıimdiligi men qarjylyq turaqtylyǵyn arttyrady, — dedi ol.

Sondaı-aq memlekettik qoldaýǵa ıe bolatyn kınojobalardy irikteýdiń jańa erejeleri bekitildi. Bıyl jańa erejeler boıynsha konkýrs ekinshi ret ótkizilip otyr.

— Kınostýdııany halyqaralyq yntymaqtastyqsyz damytý múmkin emes. «Qazaqfılm» sheteldik áriptesterimen birlesip birqatar mańyzdy fılmder túsirýdi josparlap otyr. Bul — qazaqstandyq kınony álemdik naryqta tanytý jáne otandyq kınematografısterdiń pozıtsııasyn nyǵaıtý úshin mańyzdy qadam.

Sonymen qatar, demeýshilerdi tartýdyń arqasynda kınostýdııada sońǵy 15 jylda júrgizilmegen jóndeý jumystary bastaldy. Bul — ınfraqurylymdy jańǵyrtýdyń alǵashqy kezeńi. Osy oraıda kınostýdııa men qazaqstandyq kınoóndiristiń damýyna úles qosyp júrgen jandarǵa alǵys bildiremin! Árıne, áńgime ázirge kúrdeli jóndeý týraly emes, biraq bul — «Qazaqfılmde» jumys isteý úshin qalypty jaǵdaı jasaýǵa baǵyttalǵan naqty qadamdar, — dedi ol.

Mınıstr «Qazaqfılmniń» turaqty ári tıimdi damýyn qamtamasyz etý úshin jan-jaqty qoldaý kórsetiletinin aıtty.

— Atap aıtqym keletini, «Qazaqfılm» tek kınotýyndylar ǵana emes, eń aldymen — sharýashylyq júrgizýshi kompanııa jáne básekege qabiletti naryq qatysýshysy. Ol joǵary kásibı kınoónerdiń damýyna laıyqty jaǵdaı jasaıdy. Sondyqtan Mınıstrlik bul kásiporyndy rejısser nemese akter emes, kınostýdııa qyzmetin tabysty ári tıimdi júrgizýge qabiletti kásibı menedjer basqarýy tıis degen qaǵıdany berik ustanady. «Qazaqfılmniń» turaqty ári tıimdi damýyn qamtamasyz etý úshin Mınıstrlik jan-jaqty qoldaý kórsetýdi jalǵastyra beredi, — dedi ol.

Aıta ketelik Aıda Balaeva «Qazaqfılm» ulttyq kınony qoldaý ortalyǵynyń qarajatyna qol jaımaıdy degen edi.