«Qazaqfılm» otbasylyq demalys ortalyǵyna aınalady — Aıda Balaeva

ASTANA. KAZINFORM — Mádenıet jáne aqparat mınıstri Aıda Balaeva «Qazaqfılm» kınostýdııasyn damytý jospary jaıynda aıtyp berdi.

— Prezıdent qol qoıǵan zańda «Qazaqfılm» endi kınoındýstrııany damytýǵa baǵyttalǵan qarajattyń 30%-yn tikeleı qarjylandyrý túrinde alýǵa quqyly degen norma qarastyrylǵan. Bul stýdııa úshin qarjylaı táýelsiz bolyp, óz kınojobalaryn josparlap, júzege asyrýyna úlken múmkindik beredi, — dedi Mádenıet mınıstri Úkimet úıinde ótken baspasóz máslıhatynda.

Qazirgi ýaqytta «Qazaqfılmdi» otbasylyq demalys ortalyǵyna aınaldyrýǵa kómektesetin ınvestor izdeý jumystary júrip jatyr.

— Sol jerde jeke kınoteatr, jabyq jazǵy kınoteatr salsaq, «Qazaqfılm» mýzeıin qursaq, arnaıy taqyryptyq dúkender men basqa da nysandardy ashsaq deımiz, — dedi A. Balaeva.

Sonymen birge, mınıstr «Qazaqfılmniń» jerleri satylmaıtynyn nemese úshinshi tulǵalarǵa berilmeıtinin atap ótti.

— «Qazaqfılmniń» jerleri tek osy uıymdy damytý úshin ǵana paıdalanylatyn bolady, — dedi Aıda Balaeva.

Buǵan deıin Aıda Balaeva «Qazaqfılm» tóńiregindegi daýǵa qatysty pikir bildirgen edi.