«Qazaqfılm» kınostýdııasy demeýshilerdiń esebinen jóndelip jatyr

ASTANA. KAZINFORM — Bıyl «Qazaqfılm» kınostýdııasy qyzmetine bıýdjetten 926,7 mln teńge bólindi. 

— Sońǵy eki jylda kınostýdııada aýqymdy jańǵyrtý jumystary júrgizilip jatyr. Tabys kóleminiń artýy men shyǵyndardy ońtaılandyrý nátıjesinde, byltyr «Qazaqfılm» sońǵy 7 jylda alǵash ret ózin-ózi aqtaıtyn uıymǵa aınaldy. 15 jyldan beri alǵash ret kınostýdııada demeýshiler esebinen jóndeý jumystary bastaldy, — dedi Mádenıet jáne aqparat mınıstrligi mádenıet komıteti kınematografııa basqarmasynyń jetekshisi Ǵanı Muratov elordada ótken baspasóz máslıhatynda.

Kınostýdııa byltyrdan bastap birneshe baǵyt boıynsha memlekettik qoldaýǵa ıe bolyp otyr:

— fılmderdi dıstrıbýtsııalaý jáne kóbeıtý;

— Altyn qordaǵy fılmderdi tsıfrlyq restovratsııalaý;

— shetelde qazaq kınosy kúnderin ótkizý.

— «Qazaqanımatsııa» shyǵarmashylyq birlestiginiń jumysyn qamtamasyz etý.

— Ótken jyly kınostýdııaǵa 903,2 mln teńge bólindi, al bıyl 926,7 mln teńge qarastyrylǵan, — dep tolyqtyrdy mınıstrlik ókili.

Sáýirde Mádenıet jáne aqparat mınıstri Aıda Balaeva «Qazaqfılm» otbasylyq demalys ortalyǵyna aınalatynyn aıtqan edi. 

Sondaı-aq Aıda Balaeva «Qazaqfılm» tóńiregindegi daýǵa qatysty pikir bildirdi.