«Qazaqfılm» kınostýdııasy halyqaralyq televızııalyq kórmege qatysty

ASTANA. KAZINFORM — Sh. Aımanov atyndaǵy «Qazaqfılm» ulttyq kınostýdııasy bıyl Frantsııanyń Kann qalasynda ótken MIPCOM 2025 halyqaralyq televızııalyq kórmesine qatysty. Bul týraly Mádenıet jáne aqparat mınıstrligi habarlady.

Іs-shara Festıvalder men kongresteı saraıynda (Palais des Festivals et des Congrès) jáne irgeles aýmaqtarda ótti.

Kınostýdııa pavılonynda «Qazaqfılmniń» barlyq fılmderi men «Altyn qoryndaǵy» úzdik týyndylar, sondaı-aq «Ulttyq kınony qoldaý memlekettik ortalyǵy» tarapynan qarjylandyrylǵan zamanaýı fılmder usynyldy. Kórermender men halyqaralyq seriktester nazaryna kórkem, derekti jáne anımatsııalyq fılmderdiń keń toptamasy tanystyryldy.

Kınostýdııa ókilderi qazaqstandyq kıno jáne telejobalardy sheteldik dıstrıbıýtorlar men seriktesterge tanystyryp, halyqaralyq yntymaqtastyq ornatý baǵytynda birqatar kelissózder júrgizdi. Bul qadam — otandyq kontenttiń álemdik naryqtaǵy kórinisin keńeıtip, jańa múmkindikterge jol ashqan mańyzdy bastama boldy.

MIPCOM — teledıdar, strımıng jáne tsıfrlyq kontent ındýstrııasyna arnalǵan álemdegi eń iri kásibı alańdardyń biri. Bıylǵy is-sharaǵa 107 elden 10 600-den astam qatysýshy keldi. Kórme kóshbasshylary qatarynda Ulybrıtanııa, AQSh, Frantsııa, Germanııa, Ońtústik Koreıa, Japonııa, Túrkııa, Kanada, Ispanııa jáne Italııa bar.

Uıymdastyrýshylardyń málimetinshe, bıyl Kannǵa 3 myńǵa jýyq kontent satyp alýshy kelip, jańa seriktestermen kezdesip, birqatar birlesken jobalardy talqylady. Kórme aıasynda 350-den astam kompanııa óz ónimderin usyndy.

Aıta keteıik, jýyrda «Qazaqfılm» kınostýdııasynyń polıtsııa kapıtany Ǵazız Baıtasovtyń erligi týraly fılmi kórermenge jol tartty.