«Qazaqfılm» fılmderin shetelde kórsetý quqyǵyn satyp alýy múmkin
ASTANA. KAZINFORM — «Qazaqfılm» Pýsandaǵy halyqaralyq alańda sheteldik kınokompanııalarmen kelissóz júrgizdi, dep habarlaıdy Mádenıet jáne aqparat mınıstrliginiń baspasóz qyzmeti.
Sháken Aımanov atyndaǵy «Qazaqfılm» ulttyq kınostýdııasynyń ókilderi Ońtústik Koreıanyń Pýsan qalasynda ótken Asian Contents & Film Market 2026 halyqaralyq kınonaryǵynda sheteldik kınokompanııalar men kınofestıvalderdiń ókilderimen kezdesti.
Asian Contents & Film Market (ACFM) — Pýsan halyqaralyq kınofestıvali aıasynda jyl saıyn uıymdastyrylatyn halyqaralyq kınonaryq.
Іs-sharaǵa «Qazaqfılm» atynan Madına Núsipbekova men Ásem Ramazanova qatysty. Olar Ońtústik Koreıa, Mońǵolııa, Úndistan, Shvetsııa, AQSh, Reseı jáne Qyrǵyzstannyń kıno salasy ókilderimen kelissóz júrgizdi.
Úndistannyń Ramoji Film City kınostýdııasy birlesip komedııa janryndaǵy fılm túsirýge qyzyǵýshylyq bildirdi. Al Tribeca jáne Máskeý halyqaralyq kınofestıvalderiniń ókilderi qazaqstandyq jańa fılmderdi festıval baǵdarlamasyna engizý múmkindigin qarastyrý úshin olardyń materıaldaryn suratty.
Bök Content, Sunrise Media Group kompanııalary jáne Asiatiska Film Festival uıymdastyrýshylary qazaqstandyq fılmderdi kórsetý quqyǵyn satyp alý múmkindigin qarastyryp jatyr.
— Sonymen qatar sheteldik seriktester Qazaqstan aýmaǵynda fılm túsirýge jáne «Qazaqfılm» kınostýdııasynyń túsirilimge qajetti qural-jabdyqtaryn paıdalanýǵa qyzyǵýshylyq tanytty. ACFM kınonaryǵyna qatysý sheteldik áriptestermen birlesip fılm túsirýge, qazaqstandyq týyndylardy halyqaralyq naryqqa shyǵarýǵa jáne olardyń bedeldi kınofestıvalderge qatysýyna jańa múmkindik ashady, — delingen habarlamada.
Osyǵan deıin Almatyda «Qazaqfılm» parkiniń tujyrymdamasy ázirlenip jatqanyn aıtty.
