«Qazaqfılmniń» memleket menshiginde qalǵanyn jaqtaımyz - Arystanbek Muhamedıuly

ASTANA. QazAqparat - Sháken Aımanov atyndaǵy «Qazaqfılm» kınostýdııasynyń memleket menshiginde qalǵanyn jaqtaımyz. Bul týraly búgin Úkimet úıinde ótken baspasóz máslıhatynda QR Mádenıet jáne sport mınıstri Arystanbek Muhamedıuly aıtty, dep habarlaıdy QazAqparat.

«Bul máseleni kótergen Qýanysh Sultanov (Májilis depýtaty) aǵamyzǵa rahmet. «Qazaqfılm» memleket menshiginde qalýy kerek. Nege deseńizder, ol bizdiń tarıhymyz, keleshegimiz», - dedi Arystanbek Muhamedıuly.

Sonymen qatar ol kınostýdııany satyp alýshylarǵa qazaqstandyq nemese sheteldik ınvestor dep shekteý qoıylmaıtyndyǵyn aıtty.

«Ol jekeshelendiriletin nysandardyń tizimine 4-5 jyl buryn qosylǵan edi. «Qazaqfılmniń» tek 49 paıyzy ǵana satylady, al qalǵan 51 paıyzy qalaı desek te memleket menshiginde bolmaq.  Desek te, biz «Qazaqfılmniń» memleket menshiginde qalýy úshin tyrysamyz. Satyp alýshy bolmasa, qýanamyn», - dedi mınıstr.

Onyń aıtýynsha, «Qazaqfılmniń» satylymǵa shyǵarylǵan 49 paıyz aktsııasynyń qunyn Qarjy mınıstrligine qarasty táýelsiz komıssııa anyqtaıtyn bolady.

Buǵan deıin májilismender «Qazaqfılmdi» jekeshelendirýge qarsy shyqqanyn jazǵan bolatynbyz.