«Qazaqfılmniń» eki týyndysy Bashqurtstannan júldeli oraldy
NUR-SULTAN. QazAqparat - 24-27 tamyz aralyǵynda Bashqurtstannyń Ýfa qalasynda ótken 4-shi halyqaralyq «Kúmis Aqbozat» kınofestıvalinde «Qazaqfılmniń» eki fılmi júldege ıe boldy, dep habarlaıdy QazAqparat kınostýdııanyń baspasóz qyzmetine silteme jasap.
«Qyz ben teńiz» fılmi (rejısserleri - Ázız Zaıyrov pen Muhammed Mamyrbekov) «Áleýmettik jáne motıvatsııalyq kıno» nomınatsııasynda qoǵam qaıratkeri Karıne Habırovanyń atyndaǵy arnaıy júldege ıe boldy. Al fılmde basty róldi somdaǵan akter Tahır Ýmarov Bashqurtstan Respýblıkasy otbasy jáne eńbek mınıstrligi taǵaıyndaǵan «Oryndalǵan armandar úshin» arnaıy júldemen marapattaldy.
«Qazaq handyǵy. Altyn taq» kórkem fılminiń rejısseri Rústem Ábdirashev Bashqurtstan kınematografıster odaǵynyń «Ulttyq kınonyń damýyna qosqan úlesi úshin» arnaıy júldesine ıe boldy.
Esterińizge sala ketsek, bul kınofestıvalge rejısser Baqyt Qaıyrbekovtyń «Qutyda janǵan alaý» derekti fılmi qatysqan bolatyn. Fılmderdi QR Mádenıet jáne sport mınıstrligi tapsyrysy boıynsha Sh.Aımanov atyndaǵy Qazaqfılm» AQ túsirgen.
«Kúmis Aqbozat» festıvali 2014 jyly halyqaralyq baıqaý retinde jumys isteı bastady. Kelesi jyly bul festıvalge 11 elden 36 fılm, sondaı-aq Reseı óńirleriniń týyndylary qatysty. Atalǵan baıqaý birinshi kúnnen bastap Eýropanyń fılmderimen qatar Iran, Kýba, Tájikstan, Bangladesh jáne taǵy da basqa elderdiń rejısserleri túsirgen jumystaryn kórsete bastady. «Kúmis Aqbozat» festıvali álem halyqtarynyń rýhanı jáne mádenı qundylyqtaryn nasıhattaýǵa, ulttyq jáne etnıkalyq baǵyttaǵy fılmderdi túsirýshi kınematografıster shyǵarmashylyǵyn dáripteýge, Reseı aımaqtary jáne sheteldermen mádenı qatynasty damytý úshin oılastyrylǵan.
