«Qazaqfılmge» jańa mindetter júkteledi

NUR-SULTAN. QazAqparat – «Qazaqfılmge» dekoratsııalardy, pavılondardy, sahnalyq zattardy saqtaý júkteledi. Bul týraly Májilistiń jalpy otyrysynda kınematografııa jáne mádenıet máseleleri boıynsha zań jobasyn talqylaý kezinde Mádenıet jáne sport mınıstri Dáýren Abaev aıtty, dep habarlaıdy QazAqparat tilshisi.

«Atap aıtqanda, «Qazaqfılmdi» saladaǵy memlekettik qoryn saqtaýdy júzege asyratyn zańdy tulǵa retinde anyqtaý usynylǵan. Óz kezeginde «Qazaqfılm» bul qyzmetti ondaǵan jyldar boıy tabysty atqaryp keldi. Sonymen qatar jańǵyrtý aıasynda olar fılmderdi tsıfrly nusqaǵa aýystyrý qurylǵysyn satyp aldy jáne otandyq kınonyń altyn qoryn birtindep tsıfrly formatqa aýystyrý múmkindigi paıda boldy», - dedi D. Abaev.

Sondaı-aq ol ulttyq fılmder túsirýde satyp alynǵan sahna-qoıylym quraldaryn saqtaý jáne paıdalaný máselesin retteý usynylyp otyrǵanyn aıtty.

«Bul jerde dekoratsııalar, pavılondar, sahnalyq zattar týraly sóz bolyp otyr. Búginde túsirilim aıaqtalǵannan keıin barlyq jabdyq stýdııalarǵa beriledi nemese ıesiz qalady. Osy oraıda, túsirilimnen keıin qalǵan sahnalyq-qoıylymdyq quraldardy saqtaýdy «Qazaqfılmge» tapsyrý usynylady», - dedi mınıstr.

Budan buryn habarlanǵandaı, Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine kınematografııa jáne mádenıet máseleleri boıynsha ózgerister men tolyqtyrýlar engizý týraly» zań jobasy maquldandy.