Qazaqfılmdi satýǵa qatysty depýtattyq saýalyma áli jaýap joq - Qýanysh Sultanov
ASTANA. QazAqparat - QR Parlamenti Májilisiniń búgingi otyrysynda jekeshelendirý máselesi qaraldy. Osy oraıda depýtat Qýanysh Sultanov Qazaqfılmdi satýǵa qatysty óz saýalyn eske aldy, dep xabarlaıdy QazAqparat tilshisi.
"Biz bir aı buryn Úkimetke Qazaqfılm týraly depýtattyq saýal jiberdik. "Nur Otannan" jeti depýtat qol qoıdyq. Úkimet basshysy Saǵyntaevtan "Ulttyq ekonomıka mınıstrligi men Mádenıet mınıstrligi sizderge jaýap beredi" degen xat aldyq. Biraq áli kúnge deıin jaýap joq", - dedi Q.Sultanov. Depýtattyń aıtýynsha, Qazaqfılm biregeı nysan bolyp sanalady. Sebebi kıno - ol xalyqtyń rýxanı baılyǵy, mádenı qundylyǵy. Ony tek ekonomıkalyq tabys turǵysynan ǵana qarastyrýǵa bolmaıdy. "Sondyqtan biz jekeshelendirýge shyǵarylatyn árbir nysandy jeke-jeke qarastyrýymyz qajet. Naqty maqsat-mindetterdi de belgilep qoıǵan joq. Ol nysandardy satqannan keıin xalyqtyń ekonomıkalyq jaǵdaıy ǵana emes, rýxanı-áleýmettik ómiri qalaı ózgeredi? Osyny eskerýimiz kerek", - dep atap kórsetti Q.Sultanov.
Aıta keteıik, qańtar aıynda ótken QR Parlamenti Májilisiniń jalpy otyrysynda Qýanysh Sultanov Úkimet basshysynyń atyna depýtattyq saýal joldaǵan bolatyn. "Qazaqfılmdi sheteldik kompanııa satyp alsa, Qazaqstan otandyq kınodan aıyrylady. Sebebi stýdııanyń jańa ıesi óz ıdeologııasyn júrgizedi", - deıdi Q.Sultanov.
