«Qazaqfılm» janynan anımatorlardyń shyǵarmashylyq birlestigi qurylady
«Anımatsııa óneri arqyly óskeleń urpaqty tárbıeleý – ulttyq «Rýhanı jańǵyrý» jobasynyń mańyzdy mindetteriniń biri. Ózderińizge málim, alǵashqy qazaq mýlttýyndysynyń jaryq kórgenine bıyl 54 jyl toldy. Osy ýaqyt ishinde ulttyq anımatsııanyń jetken jetistigi de, kóterilgen bıigi de az emes. Eń bastysy, talaı talanttar ósip, ulttyq mektep qalyptasty. Dese de, zaman kóshi ilgeri ketýde. Oǵan ilesý úshin bizdiń elimizde barlyq múmkindik bar. Bilimi men biligi mol shyǵarmashyl jastar, mamandyq násibin paıdaly kásipke aınaldyrǵan jekemenshik stýdııalar, jańa ıdeıalar men tyń bastamalar jáne, eń bastysy, osy eńbekti tutynýǵa daıyn ulan-ǵaıyr el, jasampaz aýdıtorııa bar», - dep atap ótti vıtse-mınıstr.
Óz sózinde Bolat Tilepov memlekettik tapsyrysty tııanaqty retteıtin, maqsatty jumsaıtyn júıe joq ekenin alǵa tartty. Sol sebepti anımatsııamen aınalysatyn shyǵarmashylyq toptardy qoldaýdyń jańa júıesi qurylmaq.
«Sondyqtan da kelesi jyldan bastap, jańadan qabyldanǵan ulttyq joba aıasynda «Qazaqfılm» kınostýdııasy janynan «Qazaq anımatsııa» shyǵarmashylyq birlestigi óz jumysyn bastaıdy. Onyń negizgi mindeti – ulttyq anımatsııa naryǵynda júrgen shyǵarmashyl toptarǵa bir ortalyqtan qoldaý bolyp, otandyq ónimniń órisin keńeıtýge jaǵdaı jasaý. Ekinshiden, anımatsııa ónerin tek balalar kontenti retinde emes, kıno men jarnamanyń, kompıýterlik oıyndar men veb-kommýnıkatsııa tiline aınaldyrý arqyly tolyqqandy ulttyq aqparattyq resýrs qalyptastyrý. Úshinshiden, árıne álemdik mýltındýstrııa ókilderimen, onyń ishinde búgingi festıvalge qatysyatyn sheteldik áriptestermen tyǵyz baılanys ornatyp, qazaq anımatsııasyn halyqaralyq dárejege kóterý», – dedi B. Tilepov.
Aıta keteıik, 29-30 qazan kúnderi Túrkistanda Qazaqstan, Ázerbaıjan, Bashqurtstan (RF), Qyrǵyzstan, Ózbekstan, Tatarstan (RF), Tájikstan men Túrkııanyń bilikti mýltıplıkatorlaryn bir alańǵa jıǵan ÁMEN anımatsııalyq kınofestıvali ótedi. Festıval aıasynda qala kórermenderi túrki elderiniń úzdik mýltfılmderin tegin tamashalap, anımatsııalyq joba jasaýdyń qyr-syryna qanyǵady.
