«Qazaqfılm» jańa telehıkaıaǵa balalar arasynda kastıng jarııalady
ASTANA. QazAqparat - Sh.Aımanov atyndaǵy «Qazaqfılm» kınostýdııasy «Mahabbat. Úmit. Astana» atty telehıkaıaǵa baılanysty balalar arasynda kastıng jarııalady, dep habarlaıdy QazAqparat tilshisi kınostýdııanyń baspasóz qyzmetine silteme jasap.
Serıaldy QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ reseılik «Stýdııa kıno» kompanııasymen birlese otyryp túsiredi.
Kastıngke Astana, Almaty jáne Qaraǵandy qalalarynda turatyn balalar qatysa alady.
«Telehıkaıaǵa 14-15 jas aralyǵyndaǵy qazaq, epti, ójet, túsirilimderde tájirıbesi bar ul bala men 11-13 jas aralyǵyndaǵy qazaq, ádemi, epti, kóńildi, túsirilimderde tájirıbesi bar bala kerek. Bala týraly aqparatty (aty- jónin, týǵan jylyn, boıyn, basqa da túsirilimderge qatysqany týraly) jáne fotosýretti astanacasting@gmail.com elektrondy poshtasyna jiberýge bolady», - delingen habarlamada.
Sonymen qatar, fotosýretterdi jáne bala týraly aqparatty 8 701 991 3949 nómirine WhatsApp arqyly jiberýge bolady. Kınostýdııa ókilderi bul nómirge qońyraý shalmaýdy suraıdy.
Aıta ketsek, byltyr 19 jeltoqsanda Máskeýde QR Mádenıet jáne sport mınıstri Arystanbek Muhamedıuly men «Pervyı kanal» AQ bas dırektory Konstantın Ernsttiń kezdesýi barysynda eki el kıno ındýstrııasy men televızııa salasyn damytý boıynsha yntymaqtastyq jónindegi kelisim jasalǵan bolatyn. Kelisim aıasynda birlesip kıno túsirý týraly ýaǵdalastyq bolǵan.
Elordanyń mereıtoıyna arnalyp túsiriletin tórt serıaly kórkem týyndy Reseıdiń «Pervyı kanal» telearnasynan kórsetiledi. Serıaldyń rejısserleri - Ivan Glýbokov (Reseı) jáne Oljas Ermekbaev (Qazaqstan). Atalǵan fılm mıstıka jáne fantastıka elementteri bar melodrama janrynda túsiriledi.
