«Qazaqfılm» jańa kórkem fılm túsirýde
ALMATY. Tamyzdyń 11-i. QazAqparat /Erbol Turymbetov/ - Sháken Aımanov atyndaǵy «Qazaqfılm» kınostýdııasy Asqar-Muhıt Narymbetovtyń rejısserlyǵymen «Aǵaıyndylar» atty jańa fılmniń túsirilimin aıaqtap qaldy,
dep habarlaıdy QazAqparat.
Fılm stsenarııiniń avtory Ǵalııa Eltaı. 90 mınýttyq kórkem fılm orys jáne qazaq tilderinde túsirilýde. Basty rolderde: Ǵabıt Mustafa, Gúlnár Dusmatova, Ǵaınıkamal Baıqoshqarova, Alekseı Pak, Juldyz Saparǵalıeva oınaıdy.
«Qazirgi uǵymymyzda «qala qazaǵy» men «aýyl qazaǵy» degen eki uǵymdy túsinik qalyptasyp qalǵan. Bizdiń maqsat osyny joıý. Biz bir zamannyń urpaǵymyz, biz eshqashan bólinbeımiz. Meniń jan álemimde eki tárbıe bar. Biri orys tildi orta bolsa, endi biri - tamyrymyzben baılanysty qazaqy uǵym. Osy eki jaǵdaıdyń qoǵamdaǵy sheshilý joldaryna jaýap izdeımiz. Jalpy, bul joba bizdiń stýdent kezimizden oıymyzda júrgen dúnıe edi», deıdi Ǵ. Eltaı. Onyń aıtýynsha, kınonyń janry jastar kınosy sıpatyn alǵan. Onda aǵaıyndy Berik jáne Serik atty jigitterdiń qyzyqty ómiri baıandalady.
Ǵ. Eltaıdyń stsenarııi boıynsha buǵan deıin 2004 jyly Rústem Ábdiráshevtiń «Qaıta oıaný araly» fılmi túsirilgen bolatyn. Sonymen birge, ol «Tereze» kınosynyń da stsenarııin jazǵan.
