«Qazaqfılm» jahandyq modernızatsııaǵa daıyndalýda
ALMATY. QazAqparat - Ulttyq kınony qoldaý memlekettik ortalyǵynyń delegatsııasy «Qazaqfılm» kınostýdııasynda boldy, dep habarlaıdy QazAqparat kınostýdııasyna silteme.
24 shildesinde, jumys sapary aıasynda «Qazaqfılm» kınostýdııasyna Ulttyq kınony qoldaý memlekettik ortalyǵynyń basqarma tóraıymy Gúlnár Sársenova bastaǵan delegatsııasy keldi. «Qazaqfılmniń» prezıdenti Aqan Sataev qonaqtar úshin kınostýdııa aýmaǵy boıynsha ekskýrsııa ótkizip, UKQMO ókilderin túsirilim pavılondarynyń, jabdyqtar parkiniń, rekvızıtter men kostıýmderdiń jaı-kúıimen tanystyrdy, sonymen qatar qazirgi tańdaǵy máseleler men alǵa qoıǵan josparlarymen bólisti.
«Qazaqfılmniń» basshysy aldaǵy jahandyq modernızatsııa barysynda kınostýdııany qajetti zamanaýı tehnıkamen jabdyqtaýǵa kómektesetinin qazaqstandyq kınoındýstrııa mamandaryn (suranysqa ıe operatorlar, dybys ınjenerleri, sýretshiler, montaj jáne kompıýterlik grafıka mamandary men basqa da kıno salasyndaǵy qyzmetkerler) keńesshiler retinde shaqyratynyn aıtty. Aqan Sataev shyǵarmashylyq mamandardyń jumysynyń tıimdiligi men jaılylyǵyn arttyratyn erekshe atmosfera qurýdy josparlap otyr.
UKQMO basqarma tóraıymy Gúlnár Sársenova kınostýdııanyń jańa basshylyǵynyń bastamalaryn qoldady, jumysyna sáttilik tilep, jan-jaqty qoldaý kórsetýge daıyn ekendikterin bildirdi.
«Qazaqstandyq kınoındýstrııany damytý - bizdiń ortaq isimiz. Sonymen qatar, biz Qazaqstanda kıno túsirýge úlken qyzyǵýshylyq tanytatyn sheteldik kıno óndirýshi kompanııalar úshin laıyqty tehnıkalyq baza qurýymyz kerek», - dep túıindedi ol.
